Folktingi angajoqqaanut Danmarkimi efterskolertuutilinnut efterskolit coronavirusimik ajornartoornermi matugallarneranni ikiorsiissuteqartalissalluni aalajangerpoq.Assi: PR foto

Efterskolit: Ilaqutariit efterskolertuutillit aningaasanik utertuussapput

Danmarkip naalagaaffia angajoqqaanut Danmarkimi efterskolertuutilinnut aningaasanik sipaaruteqartitsissaaq. Coronavirusilu ukiaru tunillaassuutileqqissagaluarpat aamma taamaaliussaaq.

Danmarkimi efterskolit coronavirusi tunillaassuutilermat marsip ulluisa aqqaneq-aappaanni matugallarneqarput. 

Taamaakkaluartoq nunatsinni Danmarkimilu ilaqutariit efterskolertuuteqarnermut suli akiliuteqartarput. Danmarkimili naalagaaffik tamatumunnga atatillugu iliuuseqaleruttorpoq.

540 millionit koruunit efterskolinut angajoqqaanullu efterskolertuutilinnut ikiorsiissuteqarnissamut immikkoortinneqassasut, Folketingimi amerlanerussuteqartut pingasunngornermi akuersissutigaat.

AAMMA ATUARUK Naalakkersuisoq: Efterskolertut Danmarkimiiginnartariarput - angerlarniarunilli akiliunneqarsinnaapput

Isumaqatigiissut naapertorlugu angajoqqaat efterskolertuutillit tamarmik 1000 koruunit tungaannut sapaatit akunneranut utertoortassapput. Isumaqatigiissut taanna apriilip naanissaanut atuuppoq, isumaqatigiissulli efterskolit matugallarnerat  sivitsorneqassappat atuutiinnassalluni.

Angajoqqaat Danmarkimi efterskolertuutillit aningaasat namminneq akiliutigisartagaat ima amerlatigipput:

Ilaqutariit ataatsit ataatsimik Danmarkimi efterskolertuutillit aningaasat agguaqatigiisillugu namminneq akiliutaat ima ipput:

 

Inoqutigiit 0 - 340.000 kr.-nik ukiumut aningaasarsiallit  = 0 kr. 

Inoqutigiit 340.000 – 500.000 kr.-nik ukiumut aningaasarsiallit = 500 kr.

Inoqutigiit 500.001 kr.-niit qummut ukiumut aningaasarsiallit = 1.150 kr.

Paasissutissanik pissarsiffik: Sullissivik.gl

- Tassa imaappoq, angajoqqaat maannakkut efterkolertuutillit efterskolit matoqqagallarneranni 1000 koruunit tungaannut utertoortassapput. Meeqqatik efterskolemiinngippata efterskolernerannut soorunami akiliissanngillat, Danmarkimi Efterskolit Kattuaffiata siulittaasua Torben Vind Rasmussen oqarpoq.

Ikiorsiissutit ilaqutariinnut namminneq akiliisartunut atorneqassasut

Aningaasat taakkua efterskolinut tunniunneqaqqaassapput, taakkualu angajoqqaanut efterskolertuutilunnut aningaasanik nassiussisassapput.

Danmarkip naalagaaffia aamma Namminersorlutik Oqartussat angajoqqaanut Danmarkimi efterskolertuulinnut maanna tapiissuteqartarput. Angajoqqaat ukiumoortumik aningaasarsiaat tamatumani aallaaviusarput.

Aningasalli ikiorsiissutaasut angajoqqaat tapiissutit peereerlugit namminneq akiliutigisartagaannit amerlanerusinnaanngitsut, Danmarkimi Efterskolit Kattuffiata ilisimatitsissutigaa.

Nunatsinni ilaqutariit 340.000 koruunit tungaannut ukiumut aningaasarsiallit qitornamik Danmarkimi efterskolernerannut aningaasartuutiminnut tamakkiisumik tapiissutisisarput. Taamaattumik taakkua Folketingimit ikiorsiissutisinavianngilat.

Ilaqutariilli amerlanerusunik ukiumut aningaasarsiallit Danmarkimi efterskolertuuteqarnermi akiliutinut ikiorsiissutisisassapput 

Coronavirusi tunillaassuuteqqilissagaluarpat ikiorsiissutit ataannaassasut

Coronavirusi Danmarkimi ukiumi atuarfiusumi nutaami tunillaassuutileqqissagaluarpat aamma ikiorsiissuteqartoqarsinnaasoq isumaqatigiissutip ilagigaa, Torben Vind Rasmussenip ilisimatitsissutigaa.

- Coronavirusi ukiaru tunillaassuuteqqilissagaluarpat, angajoqqaat efterskolertuutillit akiliuteqarnerminnut atatillugu 1000 koruunit tungaannut ikiorsiissutiseqqittalissapput, Torben Vind Rasmussen oqarpoq.

AAMMA ATUARUK Naalakkersuisut kalaallinut atuartunut: Danmarkimiiginnaritsi

Tamatuma saniatigut Danmarkimi efterskolit katillugit 20 millionit koruuninik aningaasaliiffigineqarput, aningaasallu taakkua angajoqqaat efterskolertuutillit coronavirusimik ajornartoornermi suliffeerussimagaluartik ukioq atuarfiusoq 2020-2021-mi efterskolertuuteqarnissaannut qulakkeerutaassapput.

Taamaattumik Danmarkimi Efterskolit Kattuffianni siulittaasup nunatsinni, Savalimmiuni Danmarkimilu angajoqqaat aasaanerani sulinngiffiup kingorna efterskolertuuteqalertussat tamarmik qitornamik efterskolernissaanik - coronavirusi aningaasaatikinnertilluunniit peqqutigalugit - taamaatitsinnginnissaannut kajumissaarpai.

- Efterskolit tamatuma kingunerisaanik akiminnik appaasinnaanngorput. Taamaattumik coronavirusimik ajornartoorneq peqqutigalugu taamaatitsissagunik imminnut ajoqusiinnassapput. Aaqqiissuteqarnissarli anguniarlugu efterskolimut saaffiginnissasut kajumissaarpavut, Torben Vind Rasmussen oqarpoq.

Folketingip ikiorsiissutiginiagai pillugit paasisaqarnerorusukkuit una atuaruk.

Isummersuutit