Efterskolissami pisortassatut piukkunneqartut marluinnanngorput

Qasigiannguani efterskolissami pisortassatut qinnuteqartunit piukkunneqartut maanna marluinnanngorput. Taakku aappatik ilagalugit aggersarneqarput, maajip tallimaanniillu qulingiluaata tungaanut, Qasigiannguaniissapput oqaloqatiginnikkiartorlutik.
apriilip 16-at 2008 08:14

Efterskolissaq Villads Villadsenip Efterskole-anik taagorneqarpoq, pisortatigoortumilli suli atserneqarani.

Atorfimmik inuttassarsiuineqarmat inuit 18-it soqutiginnillutik saaffiginnipput, taakkunanngalu qulit qinnuteqarlutik. Qinnuteqartunit arfinillit oqaloqatigereerlugit marluk maanna piukkunneqalersut, avataaniit atorfinitsitsisarnermut ataatsimiititaliami siunnersorti Flemming Horsfeldt ilisimatitsivoq.

Efterskolemi pisortanngortussat Flemming Horsfeldtip, KIIIP-imi ilinniartitaanermut siusinnerusukkut inspektøriusimasup, aggustip aqqarnganniit 21-ata tungaanut aallarnisarnissaanni ikiussavai. Taakku sulilernissaminnut atatillugu Sisimiunut Nuummullu tikeraartinneqassapput.