Efterskolertussat akuerineqanngeratarsinnaapput
Atuarfitsialaap pisussaaffimminik naammassinninngilluarnera, sinerissami inuusuttuaqqanit efterskolernissamut qinnuteqarsimasunit 290-init, 176-it akuerisaanngitsoornerannik kinguneqarataannaavoq, taama Sisimiuni Oqaatsinik Pikkorissarfimmi siunnersorti, qinnuteqaatinillu suliaqartartoq, Lars K. S. Olsen oqarpoq. Efterskolertitsisarnermut peqqussut nutaaq malillugu iliuuserineqanngitsoorsimasut pillugit Lars K.S.Olsen ima oqarpoq:
-Peqqussummi malunnarnerpaamik nutaartaavoq qinnuteqarfissap decembarip aallaqqaataanut killeqalernera. Taassuma saniatigut atuarfiup oqaaseqataa karakteerillu ilanngunneqartalertussaapput, Lars K.S. Olsen oqarpoq oqarporlu sinerissami atuarfiit maannamut marluinnaat, tassa Ilulissani Mathias Storchip Atuarfia Uummannamilu Edvard Krusep Atuarfia eqqortumik immersuisimasut. Qinnuteqartut taama amerlatigisut piumaffigeqattaarnerat assut pisarissersuutaanerarpaa. Lars K. S. Olsen erseqqissaavoq qinnuteqaatit sinneruttut sulilu takkusimanngitsut qanoq pineqarnissaat Pisortaqarfimmut saaffiginnissutigereeritsik, sap.ak. tulliani akissutisinissartik naatsorsuutaasoq.
Qinnuteqaatit piffissaq kingulleq atorlugu nassiunneqanngippata piumasaaqaatit naapertorlugit Oqaatsinik Pikkorissarfik itigartitsisinnaasoq Lars K. S. Olsen oqarpoq
Sisimiuni Oqaatsinut Pikkorissarfimmi pisortaq Johan Meyer radioaviisimut oqarpoq sinerissami inuusuttuaqqat efterskolerniarlutik qinnuteqarsimasut qinnuteqaataat naammassillugit immersukkat amerlanerit manna tiguneqareersut, qinnuteqaatillu naammassivillugit suliarineqarsimanngitsut 25-it maanna kisinngoruttut, taakkulu ataasinngorpat tigunissaat naatsorsuutigigitsik, Johan Meyer erseqqissaavoq. Qinnuteqaatillu amigaataasut februaarip 21-iannut killeqartut, akissutissallu marsip aallartinnerani angajoqqaanut ilisimatitsissutigineqarumaartut Johan Meyer oqarpoq.
