Efterskolerniartunut pitsaanerusumik siunnersuisarnerit atuartullu piginnaasaat soqutigisaallu aallaavigalugit atuarfinnik toqqaasalerneq ukiuni kingulliunerusuni efterskolertartut angerlaannartartut ikiliartornerannut peqqutaaqataapput.
Danmarkimut efterskoleriartartut atuarnerminnik unitsitsiinnarlutik angerlaannartartut amerliartuinnarsimagaluartut ukiuni kingullerni ikiliartuaarusaarsimapput. Assersuutigalugu 2001 - mi efterskoleraluarlutik angerlaannartut 30 procentiusut 12 procentit siorna angerlaannarsimapput.
Oqaatsinut Pikkorissarfimmi nunanut allanut siunnersorti Lars K.S.Olsen oqarpoq efterskoleriartussat aallannginnerini siunnersuilluarneq angerlaannartartut ikiliartornerannut peqqutaaqataasoq:
- Atuarfimmi siunnersorneqarneq annertusineqarpoq, aamma immersuinermi paasissutissat annertunerusungortinneqarnerisigut efterskolimik kukkusumik toqqaanissaq pinngitsoortinneqartalerpoq.
Lars´K.S. Olsen oqarpoq, atuarfiit sapinngisamik atuartunut tulluuttut qinerneqartartut.
Atuartup Danmarkimiinnerani angajoqqaarsiaqartarneq, kalaalit illuinik atassuteqartarneq kiisalu ajornartorsiornermi iliuuseqapallattarnerit iluaqutaasartut Lars K. S Olsen oqarpoq.
Inuusuttuaqqat 238 –it efterskoleriarlutik nunatsinniit augustimi aallarput, taakkunannga aqqaneq marluk maannamut utereersimapput.