Efterskoleriartarneq pilerigineqarluarpoq
Meerarisanik Danmarkimut efterskoleriartitsisarneq atorluarneqartorujussuuvoq. Meeqqat atuarfianni naammassisartut 40 procentii Danmarkimut efterskoleriarnissamut ukiut tamaasa qinnuteqartarput, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik, KIIIP, nalunaarpoq.
Efterskolernissamut ukioq manna qinnuteqarsimasunit 295-init 225-it tapiiffigineqarnissamut akuerisaasimapput, sapaatip-akunneranut 281 koruunit tapissutigineqartarput angalanerlu saniatigut akilerneqartarluni. Atuaqatigiit arlariit ukioq 2008-mi naammassisussaammata taakkunani 550-it qinnuteqarumaartut Oqaatsinik Pikkorissarfiup naatsorsuutigaa.
Efterskolerpassuit Danmarkimiittut 2007-imut 2008-mullu inissaqartitsinatik nalunaareerput. Taamaattumik ilisimatitsissutigineqassaaq efterskolimut qinnuteqarniaraanni ukioq ataaseq marlulluunniit sioqqullugit atuarfissamut qinnuteqartariaqassammat. 8. aamma 9. klassimi atuartut angajoqqaavi KIIIP-ip siunnersorpai, qinnuteqarnissamut soqutiginnikkunik meeqqamik atuarfissaannik qinaasilereeqqullugit.
Nittartagaq ujarlerfiusinnaasoq tassaavoq www.efterskole.dk, imaluunniit atuarfinni siunnersortit saaffigineqarsinnaapput. Anigaasartuutissat qanoq annertutigissanersut angajoqqaat aamma maannangaaq missorunikku ajunnginnerpaassaaq – Namminersornerullutik Oqartussanit taperneqassappata taperneqassanngippataluunniit.
