Efterskoleqarfiulernissaq qasigiannguarmiut ilungersuutigaat
Qasigiannguani innuttaasut borgmesteriatalu Jes Svanep illoqarfimmik efterskoleqarfinngornissaa sorsuutigaat. Efterskoleqarfinngornissamut qinnuteqaat aqagumut killeqarpoq, ullorlu sioqqullugu nammineerlutik pilersaarusiartik, borgmesterip Jes Svanep Naalakkersuisunut nammineerluni ullumi isaakkiartorpaa. Taama iliuuseqarnini Jes Svanep ima nassuiarpaa:
¬- Pingaartittorujussuuarput nammineerluta tunniussinissarput, naak borgmesterit Bruxellesimut angalanissaannut aamma pingaaruteqartumut ilaasussaagaluarluta, uanga borgmesteritut pingaartissimavara pilersaarusiatsinnik nammineerluta isigalugit immikkullu oqaaseqarfigalugulu tunniunnissaa.
Jes Svane aperaarput nammineerluni tunniussinissaq sooq taama pingaaruteqartiginersoq, akivorlu:
-Naalakkersuinikkut aalajangerneqarpoq nunatsinni kingusinnerpaamik 2008-mi efterkoleqalissasoq. Efterskoleqarfiunissamik siunniussaq nalunaarutigineqanngikkallarmalli tamanna Qasigiannguani eqqarsaat suliarineqarluni aallartinneqarpoq, kisiannilu unittoorluni. Massakkullu periarfissamik takkuttoqarmat atorluaalluta sukkarsoorujussuarmik suliareqqilersimavarput, aamma Qasigiannguit illoqarfittut ineriartornissaanut sunniutilerujussuartut isigingatsigu tamaviaarussimavarput.
Qasigiannguani ukiuni kingulliunerusuni arlalissuarni inuussutissarsiornikkut ineriartorneq kinguariaateqarsimavoq, tamannalu pissutigalugu efterskolissaq qasigiannguanut assut pingaaruteqartoq Jes Svane oqarpoq.
- Ima pingaaruteqartigaaq, taama ittumik pilersitsinissap illoqarfitsinnut qanoq pingaaruteqassusia innuttaasut nalunngilaat, ima periareersimatigagut, naalakkersuisut aalajangerniariarpata attataasaq tuussavarput, suliaq aallarteriaannaallugu. Ima piereersimatigaaq aappaagu atuartussat atuarfissaminnut iseriaannaallutik.
Qasigiannguani borgmesteri Jes Svane aamma oqarpoq Qasigiannguani efterskolissatut pilersaarutigineqartoq atuartunut 80-inut ilinniartitsisunullu 20-it missaanniittunut inissaqarpoq. Qasigiannguit kommuneata saniatigut kommuneqarfiit allat sisamat efterskoleqarfiusinnaasutut aamma neqerooruteqarsimapput.
