Efterskoleqalernissaq

Allattoq Karsten Sommer
aggustip 24-at 2005 16:51

Nunatsinni efterskoleqalernissaq Inatsisartunit akuerineqassasoq, inuusuttunillu aappaagumit atuarfigineqalersinnaassasoq, Inuussutissarsiornermut Naalakkersuisoq Johan Lund Olsen, inuussutissarsiutit pillugit Kangerlussuarmi isumasioqatigiinnermi ataatsimeersuaqataasunut ilisimatitsivoq.

- Inuusuttuaqqat Danmarkimi efterskoleraluarlutik unittuuinnartartut arlaqarmata periarfissinneqartalissapput nunatsinni efterskolemi atuarsinnaalissallutik. Johan Lund Olsen erseqqissaavoq.

Naalakkersuisoq aamma oqarpoq, ilinniarnertuunngorniarlutik ilinnialernissaminnut karakteerimikkut inorsalaartut ilinniarnertuunngorniarfinni atualersinnaanissaannut periarfissinniarlugit, ukiumik ataatsimik sivisussusilimmik piginnaanngorsarfissaattut ilinnialertalersinnaanissaat anguniarlugu Naalakkersuisut aningaasaliissuteqassallutik pilersaaruteqartut.

Inuussutissarsiornermut Naalakkersuisoq aamma oqarpoq, Inatsisartut aningaasanut inatsisissaq ukiaru oqaluuserilerpassuk tamanna saqqummiunneqassasoq, akuerineqariarpallu ilinniarnertuunngorniarfinnut atulissasut taamaalillutik karakteerimikkut inorsalaartut aappaagumit piginnaanngorsarlutik aallartissinnaalissallutik.