Efterskolemi ilinniartitsisoq ujarneqartoq nassaarineqanngilaq
Ujaasiffigisap ilaa, politiit qimminik ikiorserlutik aammalu Præstømi angallatik peqatigalugit ujaasiffigineqarsinnaanngitsoq, sakkutuunik qulimiguulinnik timmisartortartunit ujaasiffigineqaraluarpoq, tassalu maanna ujaasineq unitsinneqartutut nalunaarutigineqarluni.
Ilinniartitsisoq 44-nik ukiulik ipilluni toqusimassasoq naatsorsuutigineqarpoq. Efterskolemi atuartut 13-it, ilinniartitsisut marluk ilagalugit angallammik ajutoornerat ippassaq pivoq. Annattut tamarmik naapparsimmavimmi suli uninngatinneqarput, ilaat arfinillit suli peruloqisut oqaatigineqarluni.
Atuartut 13-it ilinniartitsisullu marluk angallat atugaat imarsiutissatut akuerisaanngitsoq Imarsiornermi Aqutsisoqarfiup TV2-mut oqaatigaat.
- Ajunaarneq alianartoq pinngitsoorsimasinnaagaluarpoq, angallat atugaat Imaani Angallanermi Aqutsisoqarfimmit misissorneqarsimasussaagaluarpoq akuerisaallunilu, taamaattoqarsimananili, Imaani Angallanermi Aqutsisoqarfimmi misissuisartut pisortaat, Lars Nielsen TV2-mut oqarpoq.
- Angallat taanna akuerisaasimagaluaruni atortut isumannaallisaanermut tunngasut soorlu annanniutit, radiot, qummoroortaatit allallu piareersimasuutigissagaluarpai, tassami taakku minnerpaamik akuerisaanissamut piumasaqaataapput. Misissorneqarsimasuugunilu piumasaqaatit allat aamma piumasarineqarsimassagaluarput, soorlu angallat ukiup qanoq ilinerani sumilu angallataasinnaassasoq, Lars Nielsen oqarpoq.
