Efterskole pillugu uparuartuivoq

Qasigiannguani efterskolessap Villads Villadsenimut atsiunniarneqarnera, qaqqasiortartup, ingeniørinngorniap Nick Nielsenip iluarivallaanngilaa. Villads Villadseni inuiaqatigiinnut pingaarutilippassuarnik naammassisaqarnikuusoq Nick Nielsenip Sermitsiamut allagaqaateqarnermini qularutiginngilluinnarpaa, Villads Villadsenilli timikkut pillaasarsimanera aamma uparuartorpaa.
Allattoq Mads Lynge
februaarip 17-at 2008 13:23

Meeqqat timikkut pillarneqartarnerat inatsisitigut 70-ikkunnili atorunnaarsinneqaraluartoq Villads Villadsenimooraangatta pillarneqartarpugut, Nick Nielsen allappoq, nangipporlu:

- Eqqaamavara Viilarsimoornissatsinnut annilaanngasarnikooqalunga, atuakkiortuunera, ajoqiunera, ilinniartitsisuunera allarpassuarnillu ingerlataqartuunera pissutigalugu tamanna naammagiinnarneqartariaqartarpoq, Nick Nielsen oqarpoq.

Taamaammat efterskolep Villads Villadsenimut atsiunniarneqarnera eqqarsaatigeqqinneqartariaqartutut nalilerpaa:

- Qasigiannguani efterskoleliulereersimagatta taava taanna anersaamik eqqortumik tunngavileriartigu Villads Villadsenimit eqqaamasapalaanik tunngavilernagu, Nick Nielsen naggasiilluni allappoq.

- Viilarsi nuannariuassavara, aamma Kalaallit Nunaanni nuannariuassavarput, taanna erseqqissaatigiuassavara, kisianni maligassiuilluartoq ullumikkut allarluinnarmikuanga isumaga naapertorlugu aallaaveqartariaqarpoq, Nick Nielsen radioaviisimut oqarpoq. Qaqqasiortartoq, maanna ingeniørinngorniartoq Nick Nielsen Danmarkimiit taama oqarpoq.

Taassuma siunnersuutigaa Qasigiannguani efterskolessaq ”Avannaani Efterskole”-mik imaluunniit ”Qasigiannguani Efterskole”-mik atserneqarsinnaassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq