Efterskole aqqusaaqqaarlugu ilinnialerusuttut amerlapput
Ilulissani Atuarfik Mathias Storchimi atuartut aasamut soraarummeertussat 47-ut amerlanersaat aalajangereerput aasap kingorna suniarnerlutik.
Amerlanersaat efterskolemut qinnuteqarput atuartullu Nunarput ullumimut oqaluttuaraat tassani inuttut inerinnerunissaq aammalu qallunaatut suli pikkorinerulernissaq anguniarlugu.
Tamanna ilinniartitsisuata Lis Møllerip ilisarsiffigaa.
- Takussaasarput inuusuttuaqqat atuagarsornikkut pikkorikkaluartut ilinnialernissamut suli inuttut inerissimanermikkut piareersimanngitsut, taama Lis Møller KNRimut oqarpoq.
Ilinniartitsisullumi atuartuutigisimasatik naapittarpaat efterskolereerlutik imaluunniit AFS-ireerlutik ilinniartuunermut ikaarsaartut.
- Assut inuusuttuaqqat iluaqutigisarsimavaat assersuutigalugu GU-mi aallartinnginnermi efterskoleqqaarsimanertik, taama Lis Møller oqaluttuarpoq.
Meeqqat atuarfianni atuartunut angajullernut siunnersortit sineriammeersut peqatigalugit taanna isumaqarpoq 11. klasse atulerseqqinneqartariaqartoq, namminerlu aamma 11. klasse atorunnaanngikkallarmat tassani atuartunut ilinniartitsisuusarsimavoq.
- 10. klasset ilaat ilinnialernissamut piareersimasarput ilaqarpulli suli piareersimanngitsunik. Taakkuuku suli inerinnerunissamut periarfissinniarlugit 11. klassep atuleqqinnissaa piumasarigipput ilinniartunngortigatik suli inerinnerunissamut periarfissaqarniassammata, taama Lis Møller oqarpoq.