EFTA-mut ilanngunnissarput pilersaarutaanngilaq

Killilersugaanngitsumik niueqatigiiffimmut, EFTA-mut, Kalaallit Nunaata ilaasortanngornissaa naalakkersuisut pilersaarutiginngilaat. Island, Norge, Lichtenstein Schweizilu EFTA-mut ilaasortaapput.

Demokraatineersup, Marie Fleischerip, Kalaallit Nunaata EFTA-mut ilaasortanngorsinnaaneranik naalakkersuisunut apeqquteqaataa tunngavigalugu nunanut allanut tunngassuteqartunut naalakkersuisoq, Josef Motzfeldt, taama ilisimatitsivoq. Marie Flescherip apeqquteqarnerminut tunngavigaa, Savalimmiut EFTA-mut ilaasortanngorsinnaanermut periarfissamik maannakkorpiaq misissuimmata.

Kalaallit Nunaat EU-mut 1985-imi ilaasortaajunnaaramili killeqanngitsumik niueqateqarsinnaanermik Norgemut Islandimullu isumaqatigiissuteqartarpoq. Nunanut ilaasortaanngitsunut killeqanngitsumik niueqatigiissinnaanermut EU-p neqeroorutaa Kalaallit Nunaata EU-mut ilaasortaajunnaarami atorsinnaanngorpaa, tassa tunisassianut tamanut EU-mi niuerfinnut akitsuusigaanngitsumik eqqussisinnaalerluni.