Edvard Kruse-p Atuarfia aserorteriffigineqarpoq
Uummannami Edvard Kruse-p Atuarfiani pisortap tullersortaa, Lars Poort, avaanngunartumik ullaaq misigisaqarpoq. Atuarfik nalunaaqutaq arferngup qeqqanut ammariartoramiuk init atuarfiusut ilaat immiaaqqat puuinik aseqqukunik ujaqqanillu ulikkaavissimapput. Atuarfiup matui qisuusut arlallit kaataq atorlugu serlersaarfigineqarsimasut aamma takuneqarsinnaavoq.
aggustip 29-at 2007 12:25
Serlersaartut atuarfiup igalaava aseroriarlugu qarasaasialeriffikkoorsimapput. Assiliivik digitaliusoq, imiisiviillu arlallit tillinniat tillissimavaat.
-Aserorterineruvoq, Lars Poort oqarpoq, ilanngullugulu oqarluni, ukiut sisamat missaasa matuma siorna aamma taamatungajak misigisaqarsimallutik. Atuarfik tamangajammi taama aserorteriffigineqarsimasoq takkulluni misigisaq nuanniitsorujussuuvoq, atuarfiup pisortaata tullersortaa oqarpoq.
Edvard Kruse-p Atuarfiani igalaamineqarpallaaqimmat aserorteriffigineralu ingasappallaaqimmat atuarfik ullumi matoqqavoq, atuartulli aqagu ullaakkut atuariartorsinnaanissaat naatsorsuutigineqarpoq. Kikkut serlersaarsimanersut suli paasineqanngilaq.
