Edmund Joensen: Savalimmiut EU-mut ilaasortanngortariaqarput
- Island EU-mut ilaasortanngussappat, aalisakkanik nunanut allanut tunitsisartut Savalimmiuneersut unammillersinnaajunnaassapput. Tamanna aningaasaqarniarnitsinnut kalluisinnaavoq, atugarissaarpallaarunnaarnitsinnillu kinguneqarsinnaalluni. Tamanna akissaqartinngilarput, Edmund Joensen, Venstrekkut folketingimi ilaasortaatitaannut ilaasortaasoq oqarpoq.
Savalimmiut EU-mut ilaasortanngornissaq pillugu isumaqatigiinniartoqartariaqalersoq, taassuma ujartorpaa, ilaasortanngorsinnaanissamut piumasaqaatit suunersut taamaaliornikkut paasinartunngussammata:
- EU-p aalisarnermut politikkia siunissatsinnut qanoq sunniuteqarsinnaanersoq paasisariaqarparput, Edmund Joensen oqarpoq.
Savalimmiut EFTA-mut, tassa Europami nunat akornanni niueqatigiinnissamut suleqatigiiffiannut ilaasortanngornissaa, Savalimmiuni naalakkersuisut maannamut sulissutigaat.