Edmund Joensen Danmarkimi pingaaruteqaleriaannaavoq

Savalimmiuni inuiaqatigiit pillugit ilisimatooq, Jógvan Mørkøre, Ritzauimut oqarpoq, Edmund Joensenip nammineq aamma inissiffini annilaarutiginnguatsiaraa.

- Edmund Joensen assigiinngitsunik oqaseqaqattaarmat paatsiveerunnarpoq, ilami ilumoorpa naalakkersuisunngortussanut ilaasortat 90-iattut tapersersuisuussasoq, imaluunniit ilaasortat 89,5-iattut, 89,9-attulluunniit inissisimassava?, Jógvan Mørkøre oqarpoq.

Joensen oqarpoq ministeriuneq Anders Fogh Rasmussen tamatigut tapersersussallugu, aammali oqarluni, nunanut allanut tunngasunut Savalimmiuni naalakkersuisut isumaqatiginngisaannut taaseqataasarniarani. Irakimi sorsunneq assersuutigigaanni, Naalagaaffiit Peqatigiit avaqqullugit Danmarkip sorsoqataanera Savalimmiormiut akerleraat. Taamatut pisoqartillugu, Naalagaaffiit Peqatigiit innersuussutaasa malinneqartarnissaat Savalimmiuni Naalakkersuisut aalajangiusimavaat.

Folketingimut qinersisoqareerneratigut naalakkersuisunngortitsiniarnermi Savalimmiuniit ilaasortanngortup aalajangiisunngorsinnaanera aatsaat pilinngilaq. Òli Breckmannip, Folkeflokkenimeersup, TV2-p pilersinnissaa qulakkeerinneqataaffigaa, Socialdemokratineersullu Jóannes Eidesgaardip 1998-imi Nyrupip naalakkersuisuutitaqaannarsinnaanera qulakkeernikuuaa.