Ecstasymik nassaartoqarnera kalaallip arnap toquneranut attuumassuteqarsorineqartoq
- Toqusup timaata misissorneqarnerata nalunaarusiarigallarneqarneranit paasivarput arnaq 21-nik ukioqartoq ecstacytorsimanini toqqutigisimagaa, ecstacyllu taassuma asserluinnaa tigusarineqartumi nassaarivarput, Silkeborgip politiivini politikommissæri, Bent Riber Nielsen, TV Midtvestimut taama oqarpoq.
Arnaq inuusuttoq Aalborgimi ilinniagaqartuuvoq, aviisilu AG naapertorlugu 21-nik ukiulik Silkeborgimi ikinngutiminut tikeraarnermini ikinngutinilu fiisternerminni peqqiilliulersimapput napparsimmaviliaanneqarlutillu. 21-nik ukiulik annaanniarlugu nakorsat ilungersorsimagaluarput iluatsinnaguli, ikinngutaa aniguilluarpoq.
Ecstacymik kusugaasanngortitamik, iisartakkanit sakkortunerusumik atuinissaq politiinit mianersoqqussutigaat.
- Arnatut pineqartutuulli siornatigut ikiaroornartumik misiliisimanngikkaanni toqqutigineqarsinnaasumik timi qisuariaateqarsinnaavoq, politikommissær Bent Riber Nielsen taama oqarpoq.
Toqusup arnaa TV Midtvestip nittartagaani allaaserisamut oqaaseqaateqarluni allappoq ikiaroornartumik tuniniaasut tigusarineqarnissaat neriuutigalugu.
- Tigusarineqartoq panima toquneranut attuumassuteqarnersoq naluarput, tigusarineqarsimanerali tusakkanni nuannernerpaat ilagivaat. Taamaammat matuminnga atuartusi tamassi, mianersoritsi!!!!!!!!!!!!!!!, anaanaasoq taama allappoq.
Angutip 21-nik ukiullip tigusarineqarneranut atatillugu MDMA 130 grammi, hashi 949 grammi, amfetamini 19 grammi ketaminilu 83 grammi politiinit arsaarinnissutigineqarput.
