Earth Charter nersornaaserneqarpoq

Nunami namminermi pissutsinut aamma avatangiisinut naalakkersuisup Anthon Frederiksenip, Namminersorlutik Oqartussat avatangiisinut pinngortitamullu nersornaasiuttagaat, Narsami Earth Charterimik pilersitseqataasumut Finn Lyngemut ippassaq tunniuppaa.
Allattoq Elisa Isaksen
decembarip 09-at 2009 09:17

Earth Charter Narsaq nersornaaserneqarpoq, avatangiisinik aamma nungusaataanngitsumik piniarnissamik soqutiginninneq annerulersissimagamiuk, tamanna Narsami persuarsiornartumik katerisimaartoqarnerani ippassaq tunniunneqarpoq.

Earth Charter Narsaq nunani tamalaani inuinnaat sunniiniarlutik suliniarneranni oqariaaseq 'Nunarsuarmi naleqquttumik inuuneqarneq' aallaavigineqarpoq, nungusaataanngitsumik piniarneq pineqarluni, peqatigiiffillu maani uraani pillugu oqallinnermi saqqumilaarluarpoq.

Avatangiisinut pinngortitamullu nersornaat inunnut, suliffeqarfinnut imaluunniit suliniaqatigiinnut maligassiuillutik pinngortitamik avatangiisitsinnillu soqutiginninnerulersitsisut imaluunniit suliniuteqarnermikkut Nunatsinni avatangiisinik pitsaanerulersitsisut.