- Pilersaarusiornertalimmik aamma isumaliortaasiuvoq, tamannalu timi aalatillugu aamma sammisaqartitsinertaqartassaaq, Kommuneqarfik Sermersuumi borgmesteri, Charlotte Ludvigsen, oqarpoq.Assi: artubr / Flickr

E-sport Nuummi sunngiffimmi sammisasssatut neqeroorutaalissasoq

Kommuneqarfik Sermersooq inuusuttunut ullutsinnut naleqqunnerusunik sunngiffimmi sammisassaqartitsilerusuppoq, taamaattumik E-sport - tassa qarasaasiami pinnguaammik nittartakkakkut pissartanngorniunneq - Nuummi inuusuttunut sunngiffimmi sammisassatut neqeroorutigilissavaa.

Qarasaasiami pinnguaatit spillerutillu allat soorlu Play Station, Nintendo il.il. ukiuni kingullerni atorneqaleraluttuinnarput. E-sport - tassa qarasaasiami pinnguaammik nittartakkakkut pissartanngorniunneq - ullutsinni timersuutitut akuerineqaleraluttuinnarpoq, peqataasullu nunanit assigiinngitsuneersut aningaasarpassuarnik akissarsiassartalinnik qarasaasiami pinnguaatini assigiinngitsuni pissartanngorniuttarput.

Soorlu iligiit Astralisikkut Danmarkimeersut qarasaasiami pinnguaammik Counter-Stike: Global Offensivemik atilimmik pissartanngorniunnerni siuttuusartut ilisimaneqarluarput. Taakku nunarsuaq tamakkerlugu pissartanngorniunnerni arlaleriarlutik ajugaanikuummata Danmarkimi meeqqat inuusuttullu amerlasuut ilisimalerpaat.

Kommuneqarfik Sermersooq ineriartornermut tamatumunnga malinnaanialerpoq. Tassami missingersuutit pillugit isumaqatigiinniarnerit kingulliit naammassineqareersullu aalajangerpoq, inuusuttunut ullutsinnut naleqqunnerusunik sunngiffimmi sammisassaqartitsisalerniarluni. E-sportilu Nuummi inuusuttunut sunngiffimmi sammisassassatut neqoorutigiligassaasa ilagaat.

- NUIF (Nuummi inuusuttut klubbiat, aaqq.) suleqatigalugu inuusuttunut klubbiiniittartunut sunngiffimmi sammisassatut neqeroorutigisartakkavut nutarternerisigut ullutsinnut naleqqussassavagut, E-sportilu nunarsuarmi atorneqaleraluttuinnarmat sunngiffimmi sammisassatut neqeroorutigisartakkatta ilagilissavaat, Kommuneqarfik Sermersuumi borgmesteri, Charlotte Ludvigsen, nassuiaavoq.

E-sporternermi timi aalatillugu sammisaqartoqartassasoq

Meeqqat nalunaaquttap-akunnerpassuini umeruap saaniittarmata qarasaasiami pinnguaatit angajoqqaarpassuarnit nuannarineqartorsuusanngillat. E-sportili qarasaasiami pinnguaatinik sammisaqarneriinnaanngilaq, Charlotte Ludvigsen oqarpoq nangillunilu:

- Pilersaarusiornertalimmik aamma isumaliortaasiuvoq, tamannalu timi aalatillugu aamma sammisaqartitsinertaqartissavarput.

Sunngiffimmi sammisassatut neqeroorummut peqataanermi timip pinngitsoorani aalatittarnissaa piumasaqaataassaaq. E-sporternermik ilinniartitsisut peqataasut timiminnik pinngitsooratik aalatitsinisssaat piumasarisassavaat.

- E-sport eqqaaneqaraangat qarasaasiap umeruaata saaniillutik qarasaasiami pinnguaammik sammisaqartut kisimik eqqaaneqartarput, uagulli timip pinngitsoorani aalatinnissaa piumasarissavarput. Taamaattumik peqataarusukkuit timit pinngitsoornak aalatittassavat, Charlotte Ludvigsen oqarpoq.

Illoqarfinni allani neqeroorutigineqartalersinnaaneranik misissuissasoq

Kommuneqarfik Sermersuup 200.000 koruunit 300.000 koruunillu akornanni inuusuttunut akeqanngitsumik sunngiffimmi sammisassatut neqeroorutaalersussap aallartisarnissaanut atussangavai. Taannalu 2020-p ingerlanerani neqeroorutaalissangavaa. 

- Qarasaasiami pinnguuaatinut atortut, tassa qarasaasiat assigisaallu, akisunerpaasussaassapput, Charlotte Ludvigsen oqarpoq.

Nuummilu sunngiffimmi sammisassatut neqeroorutaasalersussaq soqutigineqarluassappat illoqarfiini allani neqeroorutaalersinnaanersoq Kommuneqarfik Sermersuup misissussavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat