E-mail pinngitsoorsinnaanngilaat

juulip 21-at 2007 13:22

Amerlanerit sulereerlutik soraareersimagaluarlutik angerlaraangamik qarasaasiaq ingerlaannaq ikillugu, suliffinnut tunngasunik allagarsiassaqarersoq alakkartarpaat.

Emailikkut allagarsianik malinnaaqqissaartuuguit inuppassuit allat assigalugit taamaattunngorsimassaatit.

Tuluit misissuisimanerat nutaaq malillugu, tuluit nunaanni sulisut affaat sinnerlugit tuluit suliffeqarfiini sulisut qarasaasiakkut allagarsiassaqarnerlutik angerlarsimaffimminnit allaat aamma napparsimagaluaraangamik allagarsiassat alakkartarpaat, taama DR.dk allappoq.

Sumiikkaluaraanniluunniit allagarsiassanik alakkaasarneq pissuteqarpoq, inuit tamangajalluinnatta arajutsisaqarusungitsuunerput, aammalu e-mailinik allagarsiassanik alakkaasarnitsinni pinngitsuuisinnaanginnerput.

- Inuussutissarsiutit silarsuaanni emaileqarnerup pingaaruteqarluinnalersimanerata nassataa tassaavoq arajutsisaqarnissarput annilaagagisaratsigu, taama oqarpoq doctor Monica Seeley, Mesmo Consultancymeersoq, misissuinermik sulialik.