E-ducation ilinniartitsisussaaleqinermut iluaqutaasinnaavoq

Internetimut aningaasartuutit amerlinngikkaluarlugit e-ducation atorneqarsinnaalluarpoq.

Naak ilinniartitsisoq ungasissorujussuarmiikkaluartoq e-ducation aqqutigalugu ilinniartitsisoqarsinnaavoq.

Isorliunerusuni ilinniartitsisussaaleqinerit taamaasillutik qaangerneqarsinnaasut, Jesper Kreiner, Kompetencekompagnietimi suliniutinut pisortaq oqarpoq:

- Teknologii una atorlugu ilinniartitsisoq illoqarfimminngaanniit nunaqarfimmininngaanniilluunniit atuartut 30-t 40-lluunniit atuartissinnaavai, nunaqarfiilluunniit arfinillit ataatsikkut atuartitsiffigisinnaallugit, Jesper Kreiner oqarpoq.

Atuartut interneti atorlugu atuartinneqarsinnaapput, tamannali iluatsissinnaassappat nunaqarfiit periarfissarissaarnerusariaqarput.

Internetimut attaveqarsinnaasoqartariaqassaaq, programillu atugassat qarasaasiap ingerlassinnaasariaqassavai.

Nunaqarfiit teknikkikkut periarfissaat suunersut Namminersorlutik Oqartussat suliniutit tallimat aqqutigalugit paasiniarpaat, nalunaarusiallu sapaatip-akunnererata massuma ingerlanerani saqqummersinneqassapput.

Siunissami ilinniartitaanermi unammilligassat e-ducationip atorluarneratigut anguneqarsinnaanerat isumasioqatigiinnermi sammineqassaaq.

Isumasioqatigiinneq taaguuteqarpoq Sarfarissoq II, Nuummilu ingerlanneqassalluni.

E-ducation sulisunik ilinniartitsissutitut atorneqarsinnaavoq, sulisoreriikkanillu piginnaanngorsaaqqiinermi atorneqarsinnaalluni.