e-Boks atorlugu digitalimik tamanut allagarsiisoqartalissaaq

Allakkat pappiaqqat atorunnaariartussapput. Namminersorlutik Oqartussat digitalimik allakkerinerup innuttaasunut ingerlatseqatigiiffinnullu ajornannginnerulersitsisussap atuutileriartornissaa ukiaru aallartissavaat.

Aaqqissuussaq siullermik piumasunit atorneqarsinnaassaaq, apriilimiilli 2020-mi 15-ileereersimasut tamarmik digitalimik allagarsisalissapput. 

Tassalu Namminersorlutik Oqartussanit, kommuninit pisortanilu oqartussaasoqarfinnit allanit allakkat tigussaasut atorunnaariartussasut Namminersorlutik Oqartussat tusagassiuutinut nalunaarutigaat.

Bagger: Nunarsuarmi qeqertat annersaanniittugut qaninnerulissaagut

Digitalimik allakkerinerup pisortat, innuttaasut suliffeqarfiillu akornanni qaninnerulersitsinissaa ilinniartitaanermut, kultureqarnermut ilageeqarnermullu naalakkersuisup, Ane Lone Baggerip, neriuutigaa. 

- Nunarsuarmi qeqertat annersaanni najugaqartuusugut immitsinnut ungasippallaarnerput digitalinngorsaanerunitsigut piuneeruttutut issaaq, taamaalillunilu nunamut tamarmut digitaliseeriinermut periusissiami siunertarineqartoq naapertorlugu allakkat digitalikkut nassiussuunneqartalernerisigut immitsinnut suli qaninnerulissaagut, Ane Lone Bagger oqarpoq.

Danskit ingerlatseqatigiiffiat e-Boks allagarsianik digitaliusunik atuinissami pilersuisussatut toqqarneqarpoq, tamannalu e-boksip pisortaanerata nuannaarutigaa.

- e-Boks Danmarkimi pisortanut suleqataasutut ukiuni amerlasuuni misilittagaqarpoq, aammalu pisortat innuttaasullu akornanni attaveqaqatigiinnerup digitalinngorsarnissaanut periarfissat tamaviaarfissallu nalunngilagut. Ilisimasat taakku nunarpassuarnut maannakkut assingusunik suliassaqalersunut atorsinnaapput, Ulrik Falkner Thagesen oqarpoq.

Iluarsiissut 15-ileereersimasunit tamanit atorneqartalertussaagaluartoq, pissutsit immikkut ittuutillugit e-Boksimik atuiunnaarnissaq periarfissaassaaq. Atuisuujunnaarnissamut malittarisassat ukiup naajartornerani saqqummiunneqarumaarput.