Drop by drop Nuummut pipput
Imeq, imermillu atuilluartuuneq pillugit Nunat Avannarliit siunnersuisoqatigiivisa Naalagaaffiillu Peqatigiivisa assiliarsuarnik, tassa plakatinik saqqummersitsitsinerat Nuummut maanna apuuppoq. Tasiilamiillu nuannarineqarluaqaluni saqqummersinneqareersimalerluni. Tassa ulloq manna aallarnerfigalugu assiliarsuarnik saqqummersitsitsineq Nuuk Imermi ulluinnarni nal. Qulingiluaniit ualikkut pingasut tungaanut takuniarneqarsinnaalerpoq.
Allattoq Peter Troelsen, Knud Reimer
apriilip 23-at 2013 11:44
Erngup pingaaruteqarnera nittarsarniarlugulusooq Nukissiorfiit Nuuk Imerlu isumaqatigiissimapput meeqqat tamatumunnga ilanngunneqassasut. Taamaammat Nuummiuaqqat 7. klassini atuartut immikkut aaqqissuussivigineqarput, nunatsinnilu imermik atuineq pillugu paasissutissanik saqqummiussuivigineqassallutik, imermillu nunarsuatsinni amigaataalernikooqisup sipaarluarneqarnissaa kaammattuutigineqassalluni.
-Aamma meeqqat unammisinneqassapput. Taakkumi nunatsinni imeq pillugu ussassaarummik plakatiliortillugit unammisinneqassapput. Aaqqissuussineq Nuuk Imerup kantinaani nal. 12.30-miit nal. 14.00 ingerlanneqassaaq, taama Katja Vahl, NAPA-mi tusagassiisartoq taama oqaluttuarpoq.
Assiliarsuit ilaasa suuneri uuma ataatungaani takuniarsinnaavatit.
