Dronningikkut Siorapaluk tikeraarpaat

Kalaallit Nunaanni Naalagaaffeqatigiinnilu nunaqarfiit avannarpasinnersaat, Siorapaluk, Dronning Margrethep pernaammik ullumi tikeraassavaa. Kunngikkormiut umiarsuaq alapernaarsuut Ejnar Mikkelsen atorlugu Siorapalummukarput.
Allattoq Carla Davidsen
juulip 11-at 2011 06:20

Dronning Margrethe Prins Henrillu Nunatsinnut 1989-imi, 1997-imi 2004-milu tikeraarmata Siorapalummukarnissaat tamatigut pilersaarutaasarsimagaluarpoq, silali taamanikkut qinngasaarisarmat qulimiguulik atorlugu tikeraarnissaraluit taamaatiinnartariaqartarsimapput.

Siorapalummulli tikinnissaat qulakkeerniarlugu imaatigut tassa angalanialerput.

Pisortatigoortumik angalaneq ullaarnganiit aallartissaaq, nunaqarfimmi siulersuisunut ilaasortat siulittaasuat, Patdloq Henriksen, tikilluaqqusisuussalluni. Nunaqarfimmilu innuttaasut nalunaaquttap-akunnerani affarmi kinguninngua kaffisoqatigineqassapput.

Dronning Margrethe uialu Prins Henrik Qaanaamut pisortatigoortumik ullumi kingusinnerusukkut aamma tikeraassapput.

Kunngikkormiut malittaalu Qaanaameereerunik timmisartorlutik Upernaviliassapput, kunngikkut umiarsuaanni, Dannebrogimi, taavani unnuissallutik, Upernavimmullu pisortatigoortumik tikeraarnerat marlunngorpat tassa aallartissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq