Dronningikkut Nunatsinniinnertik nuannarilluarpaat

Dronningikkut Nunatsinni angalaarnerat naajartulerpoq, angalaarnerallu naalereernera dronning Margrethep upperisinnaanngingajappaa. Oqaluttuassarpassuaqarporlumi aamma. Itsarnisarsiuutullu misigisimasat oqaluttuassaqqissunut ilaavoq. Radioaviisip dronning Margrethe tallimanngormat oqaloqatigaa.

Suut oqaluttuassaqqissutut nalilernerai dronningi aperigaanni, taava immikkut taasassat marluusut, dronningip oqaatigaa:
Atallaarsuarnik annanniutaasinnaasunik atukkersorluni Qaanaami nunap tungaanut naloraarnera, itsarnisarsiornermullu tunngasunik annertunerusumik paasisaqarnera, dronningip oqaluttuassaqqitsippai.

Qaanaamullu Siorapalummullu tikikkaangami kunngissap Frederiup innuttaasunit eqqaamaneqarluarluni inuulluaqquneqartarnera dronningip aamma nuannaarutigeqaa.

Nunatta sermersuanik paasiniaasarfik NEEM dronningikkut aamma takuniarpaat, itsarnisarsiornermillu soqutigisaqarluarami, NEEM-imi takusatik paasisatillu, dronningip soqutigilluinnarpai.

- Tupinnaqaaq. NEEM-imut apuukkatta ilisimatinneqarpugut qillerinermi Sermersuup naqqa anguneqarsimasoq, tamaanilu sermeq ukiunik 150.000-inik pisoqaassuseqarpoq. Tupinnaqaaq, dronning Margrethe KNR-imut oqarpoq.

Dronning Margrethep, itsarnisarsiornermik meeraanerminiilli soqutigisaqalerpoq, itsarnisarsiuutullu Tuluit Nunaanni Cambridge Universitymi ilinniarnikuulluni.
Aatani, Sverigep kunngerisimasaata Gustav Adolfip, itsarnisarsiornermik soqutigisaqarnera taamaasilluni malippaa, Gustav Adolfillu Margrethe Italiamut ilaseraa, etruskerit qanga inooriaasersimasaannik paasiniaaniarluni assaasimanernut takuniaatillugu.

Dronningikkut Nunatsinniinnerminni ujarassiooq, professori Minik Rosing, ilagalugu ujaqqanik pisoqqanik misissuiartorput, dronningip nuannaarutigeqisaanik:

- Misigisaq nuanneqaaq, tupinnaqalunilu. Qulimiguulinnut ilaalluta Isuanukaanneqarpugut, tamaani ujaqqat pisoqarujussuit misissuiffigineqarnerat pillugit nassuiaasoqarluni. Tamaani ukiut 3 milliardit matuma siornatigut uumassuseqarsimasoq, Minik Rosingip takussutissaqartippaa. Tupinnaqaaq, dronning Margrethe oqarpoq.

Misigisarpassuupput, Nunatsinnili angalaarnerat naajartulerpoq, piffissarlu sukkasimaqaaq, dronningi oqarpoq:

- Taama sivisutigisumik Kalaallit Nunaanni angalareersugut upperisinnaanngingajapparaluunniit. Allaanngilaq ippaassaaniinnaarakasik tikittugut, aappaatigullu soorlu aamma sivisujaamik angalareersugut. Angalanitta nuannersuusimaneranut tamanna takussutissaannaavoq, dronning Margrethe oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat