Dronningikkut ammerivimmut pulaarput

Tamanna ammeriviup nunarsuarmioqatitsinni pitsaasumik tusaamaneqarnerulerneranik kinguneqassasoq ammeriviup pisortaata Henrik Estrup-ip neriuutigaa.

-Kunngikkut suliffeqarfitsinnut pulaarnissaannut erinisoqaagut. Aamma tusagassiortut assiliisullu maanga pulaarnissaat erinigeqaarput. Tusagassiuutimmi aqqutigalugit nunarsuarmi ajunngitsumik tusaamaneqalersinnaagatta, Henrik Estrup oqarpoq.

Ukiorpaalunngortuni ammerivik ajornartorsiorpoq.  Nunani tamalaani puisit amiinik eqqusseqqusiunnaarneq pissutaalluni sulisut arlaqaqisut soraarsinneqartariaqarsimapput. Kunngikkormiulli pulaarnerat iluaqutigalugu ammeriviup siunissaa qaammanerulissasoq Henrik Estrup-ip neriuutigaa.

- Sunaluunniit ajunngitsumik oqaluuserineqarneq uatsinnut pingaaruteqaqaaq. Ukiuni kingullerni ammeriviup oqaluuserineqarnera annertuumik ajoqquserneqarsimavoq, uumasunik illersuiniaqatigiit puisit amiinik ajorinninnerat pissutaalluni. Taamaammat massakkut kunngikkkormiut tikinnerat atorluarniarparput, Henrik Estrup oqarpoq.

Dronning Magrethe uialu Prins Hendrik puisit amiinit kavaajalianik ammerivimmit tunineqassapput. Kavaajaliat suliarineqarnerat mersortartut tamarmik suleqataaffigaat.

- Pissangavunga, Kunngikkormiut takunissaat qilanaareqaara, isumaqarluinnarpunga kavaajassatik naammagissagaat, mersoqataasoq Rita Ottossen oqarpoq.