Dronningi ullumi tikissaaq
Dronningitta tikeraarnermini tamatumuuna uini Henrik ilagissanngilaa. Ingiallortissaali tassaassapput illersornissamut ministeri Nick Hækkerup kiisalu sakkutuut qullersaat Peter Bartram.
Issittumi sakkutooqarfiup pisortatigoortumik ammaanersiorneqarnera Nuummi Kultoorikkut illorsuarmi Katuami pisussap persuarsiutigineqarnissaata saniatigut Dronningerput eqqissisimanarnerulaanik sammisaqarniarpoq, ilaatigullu sakkutuut umiarsuaq alapernaarsuutaani Hvidbjørnen-imi ulloqeqqasioqataariarluni unnukkut nerersuaqatigiinnermi peqataassaaq.
Aaqqissuussinerni taakkunani Nunatta Alapernaarsuisoqarfiani qullersatut tunuartussaq Kontreadmiral Hendrik B. Kudsk taartsissaalu Issittumi Sakkutooqarfissami qullersanngortussaq Sakkutuut timmisartortartuni Generalmajori Stig Østergaard Nielsen aamma peqataassapput.
Aamma ullup ilarujussua sakkutuut timmisartui tikerartut imaaginnavissapput, taakkunanilu sakkutuut naalagarsui nuimanerusut saniatigut Danmarkip Issittumi aallartitaa, Sakkutuut imarsiortut nipilersortartoqatigiivi tamarmik, Danmarkimilu tusagassiisarfiit sinniiserpassui tikerassallutik.
Issittumili sakkutooqarfissap pisortatigoortumik ammarnersiorneqarnissaa aqagu ullaap tungaani aallartinneqassaaq. Tamannalu nalunaaqutaq qulinut tanneq qulingiluanngorpat Katuami persuarsiornartumik aallarnerneqassalluni. Tassani inuit Nunatsinni nuimasorpassuit Naalakkersuisuni siulittaasoq Kuupik Kleist kiisalu Savalimmiormiut Lagting-iani siulittaasoq Kaj Leo Johannesen siuttuliullugit nalliutorsiortoqassalluni. Tamakkununngali aaqqissuussinerit ullup ingerlanerani sukumiinerusumik malinnaavigiumaarpavut.
