Dronningi tupermi sinissaaq

Kunngikkormiut malittaallu aqagu ullup qeqqata kingorna NEEM-imut pigunik ulloq unnuarlu ataaseq sermersuarmiissapput.

Misissuiffimmi Pituffimmiit 200 kilometerinik kangisinnerusumiittumi sulisut kunngikkormiunik tikeraartoqarnissaminnut maanna piareersaleruttorput.

- Erinigisorujussuuaat. Ulapputeqaqaat nuannaarlutillu piareersarneq ingerlappaat. Unnuissagunillumi maani misissuiffimmi pissutsinik paasisaqarnerussapput inunnillu oqaloqateqarnissaminnut periarfissaqarluassallutik. Taamaattumik maanga takuniaaniarnerat sulinitsinnillu malinnaaffiginninniarnerat nuannaarutigisorujussuuarput,  Christine Hvidberg,  qillerinermi pilersaarusiornermut pisortaasoq Kangerlussuarmi allaffimminiit oqarpoq.

Naak misissuiffimmi pissutsit nalinginnaasuunerat Christine Hvidbergip qularutiginngikkaluaraa, taamaattoq inissinneqarfissaat kunngikkormiorpalaanngivippoq. Tassami kunngikkormiut tupermi sinittussaapput.

- Toqqit ilaanni Weather ports-inik taasartakkatsinni allatuulli sinittussaavoq. Tupeq immikkuullarissuuvoq oqorsarluagaalluni aamma qisunnik nateqarluni, silaannarmillu kissartumik supoorisunik innaallagiatortunik kissassimaartinneqarsinnaalluni, Christine Hvidberg oqarpoq.

Misissuiffimmi ilisimatuut teknikerillu 20-t maannakkorpiaq najugaqarput. Sermersuarmi qillerinerminni maanna sermersuup naqqa 2,5 kilometerinik itissuseqartumiittoq qaarsoq tikissimavaat. Kingusinnerusukkut sermersuaqaleqqaarnera sioqqullugu uumasoqassuseq naasoqassuserlu misissorneqassapput, soorunami aamma sermersuup pisoqaassusia paasiniarneqassalluni.

Kunngikkormiut malittaasalu, ilaatigut Kuupik Kleist aamma Rigsombudsmand, Mikaela Engell peqatigalugit sapaatiuppat NEEM-imiit Twin-otter-imut ilaallutik Pituffiliassapput. Tamatuma kingorna Siorapaluk Qaanaarlu tikeraarneqassapput.