Dronningi: Suli qaangiinngilagut
Dronningi piffissap sivikitsup ingerlanerani Naalagaaffeqatigiinni innuttaasunut aappassaaneerluni toqqaannartumik oqaaseqarpoq. 80-iliinerminut atatillugu taamaliorpoq.
Dronningip oqalugiarnera nunatsinni KNR-ikkut aallakaatinneqartoq nunarsuarmi tamarmi coronap ajornartorsiortitsineranik ilaqarpoq. Oqalugiarnermi ilarujussua coronap nunarsuarmi tamarmi ajornartorsiortitsilluni unammillernartorsiortitsinera oqalugiaateqarfigaa.
Taassuma ajornartoortoqarnera immitsinnut tulluusimaarutigisinnaasatsinnik ilikkagaqarfiusoraa.
- Danskit inuiaqatigiinni sumiiffitsinni tamani annertuumik annikitsumillu tapersersoqatigillutalu ikioqatigiippugut. Nutaamik sammisaqarusunneq isumassarsiallu nutaat pinngorarput, sulisarnitsinni periaatsinik nutaanik ataatsimoortarnitsinnillu takusaqarpugut. Immitsinnut isumagisinnaalluta imminullu pingaartinneruneq annikinnerusoq takutipparput.
Tamatumali saniatigut coronap ajornartorsiortitsinera suli qaangiutinngitsoq aamma eqqaasitsissutigaa:
- Nappaatit nakkutigineqarsinnaalernissaanut tamatta tapiissuteqarnitsinnut ersiuterpassuupput. Immitsinnut isumagisinnaalluta tamannalu ajunngitsumik sammiveqartoq takutipparput; maannali pisariaqarpoq, sulimi qaangiinngilagut.
AAMMA ATUARUK Dronningip kalaallisoortup assilinera 80-iliineranut atatillugu frimærkiliarineqartoq
Dronningip innuttaasunut tv-kkut toqqaannartumik oqalugiartarnera ukiortaami oqalugiartarnera eqqaassanngikkaanni nalinginnaasuunngilaq.
Danskit dronningiata marsip ulluisa 17-iani oqalugiarnera 1945-mi assingusumik oqalugiarnerata eqqaassanngikkaanni innuttaasunut taama oqalugiarsimanngitsoq, nittartakkatigut aviisi altinget.dk allappoq.
Dronningilli coronap ajornartorsiortitsinera pissutigalugu inuuissiornerminik pisortatigut nalliuttorsiornissat marsip ulluisa aqqaneq-aappaannili taamaatippai.
Taamaakkaluartorli dronningi nalliussineqarpoq. Innuttaassorpassuit Kunngikkormiut nittartagaatigut pilluaqqussuteqarput, naalagaaffeqatigiinnilu innuttaasut ataatsimoorlutik inuuissiortoornissaat DR-ip aaqqissuuppaa.
Piffissarmi nalinginnaasuunngilaq coronalu Danmarkimi ajornartorsiortitsivoq. Dronningi oqalugiarnermini ima aamma oqaaseqarpoq:
- Nallittorsiornerpassuit, apersortitsinissat katinnissallu sunnerneqarput, tamanna uanga inuuissiorninnut aamma eqquivoq.
