Dronningi: Nunap tungaanut naloraarama tissinaqaaq

Ippassaq pisortatigoortumik Niaqornani pilersaarutit naammassimmata, Dronningikkut maannamut angalanerminni misigisimasatik pillugit tusagassiortunut oqaluttuarput. Angalanermi pilersaarutit allanngortinneqarsimaneri pillugit tusagassiortut piffinni kukkusuniittarsimapput. Tusagassiortunik katersortitsinermi nipitaa tamaat tusaruk. (qallunaatuujuvoq)
juulip 14-at 2011 11:11

- Uigalu isumaqarpugut isumassarsialatsialaasoq, maanna tusagassiortut Kalaallit Nunaanni angalanitsinni siullermeerluta naapikkatsigit, maannamut misigisimasagut oqaluttuarilaassallugit. Alianaatsunik, pissanganartunik illarnartunillu misigisaqarsimagatta. Dronningi oqarpoq.

Misigisallu illarnartut ilagaat Dronningi Qaanaamut naloraarluni tikimmat. Iluliamerngit tininnganeralu pillugit gummibåde ilaaffigisaat tulassinnaanngimmat.

- Atallaarsuarnik annanniutaatigisunik atorsinnaasannik tunivaannga, mikiginngilluakkannik. Nunamut aqqut kingulleq naloraartariaqartarput, illarnaqaaq misigalugu. Dronningi oqarpoq.

Dronningikkut nunatsinnut arfininngormat tikipput, avannaarsuaanniillu angalanertik aallartippaat.

Dronningi itsarnisarsiornermik soqutigisaqarluarpoq, NEEM-imilu sermersuarmik qillerilluni misissuinerit assut soqutigalugit paasiniaaffigai, sivisunermillu taakaniikkusussimagaluarpoq. Qaanaamilu Dronningi misigisaqarsimavoq attortiffigeqisaminik.

- Qaanaami aammalu Siorapalunni tikeraarninni qamuuna misigisaqarfiginerpaasara tassaavoq, naapitamma tamarmik erniga angajulleq ilassitseqqummassut, uangalu nalunngilara erninnit ilassinnissut ingerlateqqittussaallugu, aallalerlutami oqaasisa kingulliit ilagimmagu. Anaanatut tamanna tulluusimaarutigeqaara. Dronningi oqarpoq.

Siorapalummi piniartoq Japanimioq Ikuo Dronningip naapippaa, tamannalu immikkut eqqaavaa. Tikitanili tamarmik nuannersunik misigisaqarfigalugit Dronningi oqaluttuarpoq, nunattalu sinnera angalaarnissaa qilanaarinerarlugu. Dronningilu oqarnera naapertorlugu pilersaarutit maleqqissaarlugit angalasoqarsinnaanngilaq.

- Uummannamukartussaagatta Uummannamut pivugut, kisiannili aatsaat aqagu tikittussaagaluarpugut. Ullumili sumiiffissatsinniippugut, kisianni ualikkut maaniinnata ullaakkut maaniittussaagaluarpugut. Tassa Kalaallit Nunanni angalanermi ilisarnarluartoq, pilersaarutit annersaat piviusunngorsinnaapput, pilersaarutilli maleqqissaarlugit angalasoqarsinnaanngilaq. Tamaani angalanerup alutornassusaassa ilaat. Dronningi oqarpoq.

Ilanngussaq tusarnaaruk: