Dronningi New Yorkimi nersorniarneqarpoq

Danskit USA-mi peqatigiiffiat New York Danish American Society inuk 2011-mi immikkut taasarialittut toqqaapput, toqqarneqartorlu tassaavoq Ataqqinartorsouaq Dronning Margrethe.
Allattoq Mads Lynge
apriilip 25-at 2011 17:55

Danskit eqqumiitsuliaannik, ilusilersugaannillu Danmarkimi nunanilu allani qasusuilluni nittarsaassisarnini pissutigalugu Dronning Margrethe taamatut ataqqiniarneqarpoq:

- "American Society's Person of the Year"-imik toqqarneqarnerminik Ataqqinartorsuup Dronning Margrethep akuersinera tulluusimaarutigaarput, Danskit USA-mi peqatigiiffianni siulittaasoq Lisa Resling Halpern, tusagassiuutinut nalunaarummi ilaatigut allappoq.

- Danmarkip avammut nittarsaanneqarnerani danskillu eqqumiitsuliaannik avammut nittarsaassinermi Dronningip aalajaalluni sulinera tamatsinnut pingaaruteqarpoq, Halpern aamma allappoq.

American Museum of Natural Historymi, New Yorkimiittumi, ukioq manna juunip ulluisa qulingiluaanni nerersuaqartigiinnermi Dronning Margrethe ataqqiniarneqassaaq.

Inummik immikkut taasarialimmik toqqaasarneq 1959-imi aallarnerneqarpoq. TV-kkut nutaarsiassalerinermi inuk malunnaateqarluarsimasoq Walter Cronkite, eqqumiitsuliortoq Bjørn Winblad, suliffissuaatilik Mærsk-McKinney Møller aamma filmiliami ilitsersuisoq Bille August siornatigut nersorniarneqarnikuupput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq