Dronningi isorineqarpoq
- Silap pissusaa allanngortinneqarsinnaanngilaq. Tamanna nassuerutigisariaqarparput, aviisimi BT-i allassimasut naapertorlugit, silap pissusaata allanngoriartornera, nunalu qeriuaannartoq, pillugit Qeqertarsuarmi naatsumik ilisimatinneqareerami Dronningi oqarsimavoq.
Taamaalilluni silap pissusaata allanngoriartornerata inunnit pilersitaanerarneqarnera Dronning Margrethep isumaqatiginngilaa.
Danskit naalakkersuisuisa silap pissusaanut politikia taamaalilluni akerlilerpaa, oqaluttuarisaanermik ilisimatusartoq Jon Bloch Skipper Dronningi qatanngutaalu pillugit atuakkiorsimasup kukkunertut oqaatigaa, Dronningilli pisussaaffini paatsuunngilaa.
- Dronningip pisussaaffini ukiuni 40-ni nalunngittuarsimavaa, taamaammat isumaqarpunga tassanngaannaq killissani sumiinnersoq nalulersimassanngikkaa. Inuttut nammineq eqqarsaatersuutini annippaa, politikikulli oqaaseqaataanani, Jon Bloch Skipper Newspaq-imut oqarpoq.
SF-ip silap pissusianut oqaaseqartartua Anne Grete Holmsgaard Dronningip oqaasianut pakatsisut ilagaat:
- Siunnersortilussimassaaq. Kalaallit Nunaannukannginnermi silap pissusaanut tunngasunik aperineqarnissaq ilimagineqarsinnaavoq, Kalaallit Nunaannimi silap pissusaata allanngoriartornera ersareqimmat pingaaruteqarluni - ingammik kalaallinut. Tamakkulu pillugit akissutissaminut siunnersortissimassaaq, Anne Grete Holmsgaard BT-mut oqarpoq.
Dronning Margrethe uinilu Nuummi Nuullu eqqqaani ullumi ulloq namminneq atorpaat. Nunaqarfimmut inuerunnikumut sulili ornigarneqaqisumut Qoornumut ulloq qeqqata siuninngua tikissimasut tusartinenqarpugut.
Dronninngikkut Nuummiit pisortatigoortumik inuulluaqqunissaannut pilrsaarusiorneq maanna aallunneqaruttulerpoq. Pisussat tamakkerlugit suli aaqqinneqanngillat, kisianni kunngip umiarsuaa, Dannebrog, Nuup saavaniit unnugu nalunaaqutaq arfineq pingasunut qiteqquppat qamutilittartoqartillugu aallassagunarpoq. Umiarsuaq qaannanik ingiallorneqassaaq.
Pilersaarutillu tamarmik pissusissamissut ingerlappata, aappariit paamiunut aqagu ullaap tungaa qulinut tikissapput.
