Dronningep niaqorutaasaa Kalaallit Nunaannukalerpoq

Dronning Margrethep ukiuni 40-ni Dronninngiunera januarimi nalliuttorsiutigineqarpoq. Nalliuttorsiornermullu atatsillugu kalaallit kuultiannik sanaajusumik Nicolai Appelip niaqorutaasalianik Nunatsinnit tunissutaasumik Josef Motzfeld juunimi dronningimut tunniussivoq.
Allattoq Peter Troelsen, Salome Hansen
aggustip 16-at 2012 18:46

Nicolai Appel niaqorutaasamik sanasuusoq nammineerluni kuultisiorfimmut Nalunamut tikeraarsimavoq. Kalaallillu kuultiannik niaqorutaasaliornissaminut siunnersorneqarsimavoq niaqorut issittup naasui atorlugit pinnersarneqarsinnaasoq.

Maannalu niaqorutaasaliortoq Nicolai Appel Namminersorlutik oqartussanit nunatsinnut qaaqqunerqarpoq. Nunatsinnullu tikeraarnissamini dronningimut niaqorutaasaliani kusanarluinnartoq nassassavaa. Dronning Margrethe niaqorutaasami Kalaallit Nunaanni takutinneqarnissaanut akuersisimavoq.

Niaqorutaasarlu kuultimik sanaajusoq Kalaallit Nunaata Dronningimut tunissutaa, taaguuteqartoq "Naasut" 20 augustimiit 24-iat ilanngullugu Sisimiuni, Ilulissani, Nuummi, Qaqortumilu innuttaasunut takutinneqartussanngorpoq.

Nuummi niaqorutaasaq Katuami takusarneqarsinnaassaaq, Ilulissani kulturhusimi, Qaqortumilu kommunep allaffianut takusarneqarsinnaassalluni. Qaqortumi takutsinneqarnerani isiginnaarutikkut Narsami Nanortalimmilu aamma takuneqarsinnaajumaarpoq.

Sisimiuni niaqorutaasap sumi takutitassiarinissaa suli aaliangerneqanngikkallarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq