Dronning Margrethe nuummiut nalliuttorsiutigissavaat
Ileqqoq malillugu Nuummi innuttaasut Naalagaaffeqatigiinni qullersatta Dronning Margrethe II-p apriilip 16-iani inuuissiornerata nalliussinissaanut periarfissaqassapput. Nuutoqqami aaqqissuussinermi tamanna pissaaq, qamutilittartoqarneralu umiarsuarmit nakkutilliissummit Ejnar Mikkelsenimit, maannakkorpiaq Nuummiittumit, akineqassalluni.
Allattoq Peter Troelsen, Simon Uldum
Nalunaaqutaq 12.00-nngortorlu qamutilittartoqassaaq, kingornalu borgmester Asii Chemnitz Narup oqalugiassalluni. Taava Nuuk Byorkesterip inuiattut erinartuuterput upernaarsiullu atussavaat kingornalu komminimi borgmesterip meeqqat takkussimasut peqatigalugit Dronning Margrethe pilluaqqullugu erinarsussallutik.