Dronning Margrethe coronavirusimik tunillanneqarsimasutut aappassaa paasineqartoq, kunngikkormiut pingasunngornermi ilisimatitsissutigaat.Assi: Mads Claus Rasmussen/Ritzau Scanpix

Dronning Margrethe coronamik aappassaa tunillanneqartoq

Dronning Margrethe illussaarsuarmi Fredensborg Slotimiippoq. Coronavirusimik aappassaa tunillatsippoq.

Dronning Margrethe coronavirusimik aappassaa tunillanneqarsimasutut marlunngornermi unnukkut paasineqarpoq.

Kunngikkormiut nittartakkaminni pingasunngornermi taama allapput.

Dronningi napparsimanermut takussutissaqarnersoq takussutissaqannginnersorluunniit kunngikkormiut nittartagaanni allaaserineqanngilaq.

Dronningip napparsimanini pillugu sapaatit-akunnerata massuma ingerlanerani aaqqissuussanut assigiinngitsunut peqataassanngitsoq kunngikkormiut ilisimatitsissutigaat.

Dronning Margrethe, tuluit dronningiata Elizabethip Londonimi ilisaaneranut sapaatit-akunnerata massuma aallartinnerani peqataaffigaa.

Kunngissaq Frederik tassani peqataavoq, soorlu aamma kunngikkormiut allat nunanit allaneersut ilisinermi aamma peqataasut.

Inuit katillugit 2000-nit amerlanerusut Londonimi oqaluffissaarsuarmit Westminster Abbeymit ilisinermi peqataapput.

Dronnig Margrethe coronavirusimik tunillatsissimasutut siullerpaamik ukioq manna februaarip aallartisimalaarnerani paasineqarpoq.

Dronningi coronavirusimut pingasoriarluni akiuussuserneqarsimasutut taamanikkut nalunaarutigineqarpoq, nappparsimanermullu sakkukitsuinnarmik takussutissaqartoq taamanikkut aamma nalunaarutigineqarluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl