Dronning Ingridip Napparsimmavissuani ukiortaaq ulapaarfiuvoq

Naak qummoroortartut navianassusaat ukiut tamaasa mianersoqqussutigineqartaraluartoq, qummoroortartoreernerup kingorna ajoqusersimasunik napparsimmaviliartoqartuaannarpoq. Ukiullu 2012-p 2013-illu nikinneranni aamma taamatut pisoqarpoq.

-Suliassaqartinneqarpugut, inuillu imminnut allanillu paarsilluarnerusimanissaat kissaatigigaluarparput. Meeqqat nalinginnaasumik tamatigut illersuutinik isaruaqartinneqartarput, angajoqqaalli namminneq aamma eqqorneqarsinnaanertik puigoqqajaasarpaat. Tamatumunnga ukiormanna assersuutissaqarpoq, inummi ataaseq isimigut annertuumik ajoquserpoq, illersuutinillu isaruaqarsimasuuguni tamanna pinngitsoorani pinngitsoortinneqarsimasinnaagaluarluni, Jesper Olesen, Nuummi Dronning Ingridip Napparsimmavissuani nakorsaq naqissusiivoq.

Qummoroortartunilli atuinerup kingunerisaanik ajoqusernerit kisiisa napparsimmavissuarmi ukiortaarsiornerup nalaani suliarineqanngillat. Aammattaaq aalakoorlutik paannillutik  napparsimmaviliartariaqarsimasut aamma arlaqarsimapput. Inuit imigassartorsimatillutik eqqissisimanissartik nakuusernaveersaarnissartillu immaqa ilikkarnavianngilaat.

-Imigassartorpallaarsimallutik paannissimasut pisarnertut pineqarput. Imigassartortoqarsimatillugu assortuunnerit sakkortuupilussuanngorsinnaasarput. Tamannalu suliassaqareertigaluta suli ulapinnerulernitsinnik kinguneqarpoq. Inuit imigassartorpallaannginnissaannik isarussanillu illersuutinik atuinissaannik kaammattoqqiinnarsinnaavakka. Ukiortaaq taamaasilluni napparsimmavimmut pinngikkaluarluni nuannersumik nalliuttorsiutigineqarsinnaavoq, Jesper Olesen knr.gl-imut oqarpoq.