Dronning Ingridip Napparsimavissua matoriaannaavoq

Koruuninik millionerpassuarnik sipaartariaqalerneq taartaasussanik atorfinitsitseqqusiunnaarnermik kinguneqartoq ajorneruleriaannaavoq.

- Allaqquttussaajunnaarpoq. Peqqissaasut maani nunaqavissut qasupput, maannami nakorsiartarfimmi atorfeqavissut qulingiluaannanngorput. Ilimagaara Sana qaammatit sisamaanngitsulluunniit qaangiuppata matussasoq, Karin Holler oqarpoq, nangillunilu.

- Ajornartorsiut Peqqinnissamut Naalakkersuisoqarfiup ilisimagaluarpaa suliniarnerali amigavippoq. Taartaagallartartunik sulisoqartarneq Peqqinnissaqarfimmut akitsoraluttuinnartoq iliuuseqarfigineqanngilaq, allaammi nakorsiat eqqorneqartalerput, oqarpoq.

Radioavisimi qanittukkut oqaluttuaraarput taartaasartunut 9 millioni koruunit missaannik aningaasartuuteqarnerusimanerup kingunerisaanik sipaarniartoqalersoq. Taamaammat napparsimmavimmi siniffiit 19-it matuneqarput, kinguneraalu assersuutigalugu seeqquleritittussat, siffialersittussat allallu nassamikkut misissortittussat suliaritittussallu aamma eqqugaanerat. Utaqqissunneqarsinnaanngivissut kisimik Sanami nakorsarneqartalerput.

- Pissutsit qaammatialunnguani ajorsiartunngillat ukiunili arlalinni taamaaliartorsimallutik. Politikerit iliuuseqartariaqalerput, Karin Holler erseqqissaavoq.

Politikerit pimoorullugu iliuuseqanngippata Peqqinnissaqarfik

Privatinngorsarneqaraluttuinnassaaaq. Nuummi Napparsimmavissuaq Kalaallit Nunaata tamarmi napparsimmavigaa, taamaammat pisortat akisussaapput, Peqqinnissakkut Kattuffiit siulittaasuat Karin Holler naggasiivoq.

Karin Hollerip eqqoriarpaa Dronning Ingridip Napparsimaviani atorfiit 55-it taartaasartunik inuttaqartartut ilaat 25-t maanna inuttaqanngitsut.

Kalaallit Nunaani tamarmi peqqissaasutut atorfiit 20 procentii taartaasartunik maanna inuttaqartinneqartut aamma oqaatigaa.