Dronning Elizabeth toqusoq

Tuluit dronninngiat 96-inik ukioqarluni toquvoq.

Tuluit Nunaanni kunngikkormiut illussaarsuata ullumi sisamanngornermi tamanna nalunaarutigaa.

- Dronning Elizabeth illussaarsuamini Balmoralimi ualeq manna toquvoq, kunngikkormiut ilisimatitsipput.

Dronning Elizabeth napparsimasoq nakorsaniillu nakkutigineqartoq, ullumi sisamanngornermi siusinnerusukkut nalunaarutigineqarpoq. Dronning Elizabethip ilaqutai tamatuma kingunitsiannguagut najuukkiartorlutik dronningip Skotlandip kangisissortaani illussaarsuanut Balmoralialertorput.

Dronning Elizabeth Tuluit Nunaanni ukiuni 70-ini, tassa 1952-mili, dronninngiuvoq. Taanna Tuluit Nunaata oqaluttuarisaanerani sivisunerpaamik dronninngiuvoq.

AAMMA ATUARUK Dronning Elizabethip napparsimasup peqqissussaa nakorsanit ernummatigineqartoq

Dronningip ernera angajulleq, Charles, erniinnartumik kunnginngorpoq, taamaalillunilu Tuluit Nunaata naalagaaffiani qullersaalerluni.

Tuluit Nunaanni kunngikkormiut illussaarsuata, Buckingham Palacep, erfalasua maanna qiteqqusimavoq, illussaarsuullu silataa maanna aamma inoqaalulluni.

Dronning Elizabethip qitornai sisamat anaanartik illussaarsuarmi Balmoralimi toqummat najuupput.

Qitornai angujullerniit nukarlernut tassaapput kunnginngortoq Charles, prinsesse Anne, prins Andrew taavalu prins Edward. Ernutaalu marluk prins William taavalu prins Harry aamma najuupput.