Dronit, ilisimatusarnermut atugassianngorlugit
Ilisimatusarfiup atortorissaarutinik nutaaliaalluinnartunik pisiassaasa ilagaat dronit pingasut, kingusinnerpaamik ukiut sisamat qaangiuppata nunarput qulaavaallugu imaanik nunallu qaavanik assilisaarisussat. Jyllands-Posten taama allappoq.
Dronit tassaapput timmisartut inuttaqanngitsut, USA-p qaartartunik saassussinermut atortagaasut tusagassiuutini tusarsaanerusut.
Dronit paasissutissanik katersaat sikup, imaata nunallu silap pissusiisa allanngoriartornerinit qanoq sunnerneqarnerinik misissuinermut atorneqassapput. Dronit atsinnerusumi timmisaramik qaammataasat assilisaannit pitsaanerusunik eqqornerusunillu assiliisinnaapput. Aammattaaq silaannaap ozoneqassusaanik qanorlu mingutsitsisoqarsimatigineranik uuttortaasinnaapput.
Norgemiut droniliaat Cryowing 1,5 millioner koruuneqartoq pisiarineqassagunarput. Taakku timmisartunit inuttaqartunit ingerlatsinikkut akikinnerupput, taamaattumillu ullut tamaasa ingerlaartinneqarsinnaassallutik, Henrik Skov Aarhusip Ilisimatusarfiani suliniummik aqutsisuusoq Jylland-Postenimut oqaluttuarpoq.
Ilisimatusarfittaassamut aningaasaliissutissat Villumip Aningaasaateqarfiata 70 millioner koruuninik aningaasaliissuteqarneratigut pissarsiarineqarput.
