DR –p sipaarniarnera KNR-mut eqquissaaq
Danmarksradiop ukiuni tulliuttuni sisamani ukiumut 287 million koruuninik sipaarniuteqarnissaa KNR TV-p aallakaatitsineranut eqquissaaq.
KNR-p pisortaa Lars Lennert Sandgreen aperaarput, DR-p sipaarniarnera KNR TV-p aallakaatitsineranut sutigut eqqussanersoq.
- Pinngitsoorani sunniuteqartussaassooq, ingammik timersornerup tungaatigut. Taamaattumik KNR-mi pisortat akornanni sukumiinerulaartumik oqaluuserisussaassuarput; Danmarksradiop sipaarniutissai qanorpiaq iluseqarnersut – ilaatigummi tusarparput taamaativinnianngikkaat, kisiannili annertuumik ikilisaaniartut tusarparput.
Aallakaatitat timersornermut tunngasut amerlanersaat TV2-mit KNR-p pisarpai. TV2 siammarterinikkut allannguinikuuvoq, tassa TV2-p immiussai aallakaatitaalu akileqalernikuullutik.
- Tassani uagut qanoq aamma inissinnissarput paasiniartussaassuarput, akiliisariaqalissaguttalu nalilersueqqaartussaassuugut. Paasisavut isummerfissavut erseqqinneruleriarpata siulersuisunut, aamma pisariaqassappat, qutsinnerusumut anngukkumaarpagut, timersornerimmi ilaat aningaasaliisoqarnikkut, tassa sponsorilersornikkut aallakaatinneqarsinnaammata.
Lars Lennert Sandgreen aamma oqarpoq, aappaagu OL-qarnissaa aammalu arsarluni assammillu arsarluni nunarsuarmi pissartanngorniunnerit DR-mi aallakaatinneqartarneri annertuumik killeqalersussaammata KNR-p tassani qanoq inissinnissaa DR-mut oqaloqatiginnikkiartorlutik paasiniassagitsik.
