DR TV-p Kalaallit Nunaat pillugu piviusulersaarusiaa pingasunngorpat KNR TV-imi aallakaatissaaq

Allattoq Jaaku Lyberth
oktobarip 26-at 2007 16:54

Danmarks Radiup Tv-ata Kalaallit Nunaat pillugu piviusulersaarusiaa Nunatsinniit qimarranneq, qallunaatut Flugten fra Grønland sapaatip akunnerata tulliani pingasunngorrnermi oktoberip ulluisa 31-anni sisamanngorpallu novemberip ulluisa aallaqqaataani KNR TV-atigut aallakaatinneqassaaq. TV-ikut aallakaatitassiaq suli takutinneqanngitsoq soqutigineqarluarpoq. Pilersaarutaavoq TV-ikkut piviusulersaarut KNR TV-ikkut allakaatinneqareerpat oqallinneq ingerlanneqassasoq. Folketingimullu qinersinissamut qineqqusaartut KNR-ikkut oqaaseqarsinnaanerannut mattussineq aallaarteertussaammat oqallinneq ingerlanneqassanngilaq. Kingusinnerusukkut oqallinneq ingerlanneqarumaartoq KNR TV nalunaarpoq.