DR soraarsiortortitsilerpoq

DR-imi raadiu aviisi sivikillineqarpoq, TVaviisimi timersornermik ilanngutassiat annikillineqassapput, DR nutaarsiassaqartitsivimmi katillugu 22 millioner koruunit ukiumut sipaarniutigineqassapput. Rosa Thorsen tusagassiissaaq:

Danmarks Radiop sipaarniarnissarsuata pilersaarusiornera naammassivoq. DR-p ukiumut 288 million koruunit sipaarniutigisussanngorpai.

100 millioner koruunit allaffissornermi sipaarniutigineqassapput. 187,5 koruunit

aallakaatitassiornermi sipaarniutigineqassapput, taakkunannga nutaarsiassaqartitsivimmi 22 millioner koruunit sipaarniutigineqassallutik.

Danmarkimi pisut pillugit nutaarsiassaqartitsivimmi aaqqissuisoq Bettina Bendix, KNR radioavisimut oqarpoq DR-mi raatiuaviisi ullup qeqqanoortoq

30 minutsiniit 20minutsit sivikillineqassasoq. Sapaatit akunnerisa naanerini 20 minutsiusartoq 15-minutsinut aamma sivikillineqassaaq,

- Aap soraarsitaasoqassaagut, teknikerit allaffimmiullu eqqugaanerpaassapput, oqaatigisinnaanngikkallarparali qassit nutaarsiassani soraarsitaassanersut, Bettina Bendix oqarpoq.

TV-imi nutaarsiassani timersornermik immikkut tusagassiisarneq annikillisaavigineqassaaq. Timersornermik aaqqissuisoqarfissuaq matuneqarluni timersornermik suliallit nutaarsiassaqartitsivimmut ilanngutassiiginnartalissapput.

DR-imi sulisut 300-t tikillugit qaammatini tallimani aggersuni soraarsinneqassapput.