DR nunatsinnut ukkissinerussasoq piumasarineqarpoq
Tamanna danskit kultureqarnermut ministeriata, Marianne Jelvedip, Folketingemi partiinut tamanut juunimi isumaqatigiissuteqarfigaa.
Dansk Folkepartiip, Kalaallit Nunaat Savalimmiullu tusagassiuutitigut sammineqarnerunissaat sorsuutigisimagaa, Sermitsiaq allaaserisaqarpoq.
- Danmarks Radio pisussaaffeqartariaqarpoq qallunaanut naalagaaffeqatigiinneq pillugu qaammarsaanissaminut.
Tusagassiuuteqarneq pillugu isumaqatigiissut uani atuarsinnaavat.
- Naalagaaffeqatigiinni kikkut tamarmik imminnut ilisimasaqarfiginissartik pisariaqartippaat, oqaluttuarisaanermi ataatsimoorussaqarpugut, immaqalu aamma ataatsimoorussassatsinnik siunissaqarpugut, Morten Martinus, Dansk Folkepartiip tusagassiuutinut pillugit oqaaseqartartua, Sermitsiamut oqarpoq.
Naalagaaffeqatigiinneq pillugu ilisimasaqarneq qaffassarneqassaaq
Danmarks Radio Kalaallit Nunaat Savalimmiullu pillugit aallakaatitanik arlaqartunik aallakaatitsisarpoq, Kalaallit Nunaannillu nutaarsiassanik radiokkut ullut tamaasa aallakaatitsisarpoq, sapaatip akunneranullu ataasiarluni Qanorooq aallakaatinneqartarluni.
Maannalu tassa Savalimmiunit nutaarsiassanik ullormut aallakaatinneqartartussanik aallartitsisoqartalissaaq, kisianni tamanna naammangitsoq, Dansk Folkeparti isumaqarpoq.
Kalaallit Nunaat Savalimmiullu pillugit aallakaatitassianik qallunaanut saaffiginnittunik Danmarks Radio pikkorinnerulertariaqarpoq.
- Ilaqutariikkaanni, isumaqarpungami naalagaaffeqatigiinnermi ilaqutariittugut, taava immitsinnut aamma ilisarisimanerusariaqarpugut, taamaliornikkut immitsinnut paasilluarnerulissangatta ataatsimoorlutalu pingaartitagut paaseqatigiiffigalugit, Morten Marinus, Dansk Folkepartiineersoq, oqarpoq.