DR nipilersuutinik nunatsinnukartussanik katersuiniartoq
Nipilersuutillu taakku tunniussuunneqassapput, ilaallumi imaassinnaavoq Uummannami Meeqqat angerlarsimaffianni najugartut ilaannut tunniunneqartut.
Uummannami Meeqqat angerlarsimaffianni meeqqat nipilersuutit ilaannik atuisalernissaminnut ilinniartinneqarnissamik "nipilersoqatigiissuarnilu" nipilersoqataasalernissamik periarfissinneqartarput - nipilersoqatigiissuit avannarpasinnersaannik taaneqartartuni. Aammattaaq meeqqat angerlarsimaffiat 2011-miilli nipilersornermik ilinniartitsisunik marlunnik aalajangersimasumik sulisoqalersimavoq.
AAMMA ATUARUK Juullimi inuulluaqqussut nunatsinni immiunneqassaaq
Meeqqallu angerlarsimaffiat nipilersuummik tunissuteqarfigineqareersimavoq. Tassalu shakeri, taannalu erinarsortartumit Julie Berthelsenimit tunissutaavoq.
- Nipilersornermik suliniuteqarpugut, tamannalu soorunami nipilersuutinut aningaasartuuterpassuaqartitsivoq; missingersuutillu malinniartussaagatsigit tamanna soorunami killeqartitsilluni, Uummannami meeqqat angerlarsimaffianni suliniummut pisortaq, René Christensen, Danmarkip Radioata aallakaatitassiaani P2 Pulsimi taama oqarpoq.
- Nipilersornermik suliniuterput imartuupilussuuvoq aammalu nipilersornermik ilinniarfinnut nalinginnaanerusunut naleqqiullugu allatut eqqarsarluni ilinniartitsineq ingerlanneqartarluni. Assersuutigalugu meeraatitta ilarpassui sapaatit-akunneranut sisamariarlutik tallimariarlutilluunniit minutsinik 20-nik sivisussusilimmik nipilersortarput, René Christensen nassuiaavoq, taassumalu erseqqissaatigaa Danmarkimit nipilersuutinik tunissuteqartoqarsinnaassappat tamanna assut iluaqutaajumaartoq.