DR-ip juullimut pilluaqqussutaa Katuamut nuukkusukkaat
2013-imi Juullimut pilluaqqusinissap Nuummi Katuamut nuunneqarnissaa DR-ip sulissutigaa. Aallakaatitami aaqqissuisoq Thomas Christensen taama oqaluttuarpoq.
- Ukiormanna taamaalerusukkaluaratta, iluatsissinnaasimanaguli. Qularutiginngilarali aappaagu iluatsissinnaassallutigu, oqarpoq.
Ukiormanna Juullimut pilluaqqusinissamut, Koncerthusetimi aqaguagu immiunneqartussamut DR-ikkullu decembarip 22-iani KNR-ikkullu juulliaqqami aallakaatinneqartussamut, isissutissat nungoreersimapput. Juullimut pilluaqqussut taamaasilluni ukiut siuliinisulli Danmarkimi toqqaannartumik aallakaatinneqassanngilaq. Aallakaatitarli sivisuallaassappat naalisarneqarnissaanut periarfissiissaaq, aamma Guuterput kingorna piumasaqaataasutut nipaallisimanissamut inissaqartitsisinnaassalluni, Thomas Christensen oqarpoq.
Ukiormanna aallakaatitaq marlunnik sammisaqarfiussaaq: Siullertut DR-imi KNR-imilu juullimut ammartakkaneersunik nipilersortoqassaaq. Aappaattullu issittormiut ataqatigiinnerat nersorniarlugu issittormiut nipilersuutaannik nipilersortoqassalluni. Julie Berthelsen aamma ukiormanna ingerlatsisuussaaq.
DR-ip Kalaallit Nunaannut Juullimut pilluaqqussutaa decembarip 22-iani nal. 17.20 KNR2-kkut aallakaatinneqassaaq unnukkullu KNR1-kkut nal. 20.30 aallakaateqqinneqassalluni.