DR-ip aningaasaqarnikkut inissisimanera pillugu apeqqut sukumiinerusumik misissorusussinnaanerarlugu, Lars-Emil Johansen, Siumut, aamma Juliane Henningsen, Inuit Ataqatigiit, Berlingske Businessimut oqarput.
-Tunuarsimanngilagut. DR Kalaallit Nunaanni tusagassiuteqarnikkut aallakaatitsisarnermi sunniutilerujussuuvoq, DR-ip kanaalii TV-kkut isiginnaarummi annertuumik aallakaatinneqartarmata, taamaattumik paasiniarusussinnaavarput, Juliane Henningsen business.dk-mut oqarpoq. Taassuma Lars-Emil Johansenitulli erseqqissarpaa, illuatungiliuttut DR-ip aningaasatigut tapiiffigineqarnissaa pillugu kulturministerimut qinnuiviginninnialersaarnerannut tunngatillugu aalajangivitsinnatik sukumiisumik oqaloqatigeeqqaarniarlutik.
Taaseqataannginnissamut salliutillugu illuatungiliuttut tapersersorniarunikkik attaviitsoq Pia Christmas-Møller DR-imut aningaasatigut tapiissuteqarnisasq taasissutigineqassappat aalajangiisuulluinnartussanngussaaq.
Savalimmiuni Folketingimut ilaasortaq Høgni Hoydal ilisimatitsivoq suliami nammineq taaseqataarusunnani, taamaattorli ilaasortap allap Edmund Joensenip taasinera illuatungilerniarlugu, taanna isummerniarluni aalajangissappat.