DR-ip aallakaatittagaanik aallakaatitsisalerpoq

Nuuk TV-p Danmarks Radiomik isumaqatigiissuteqarnermigut, DR-ip tv-kkut radiokkullu aallakaatittagai ataasinngorpat aggustip aallaqqaataanit aallakaatittalissavai. Danmarks Radiop aallakaatittagai maannamut misiligummik aallakaatinneqartarsimapput.

TV-kkut kanalit DR1 aamma DR2 nalunaaqquttap akunneri sisamanik kingulliullutik aallakaatinneqartalissapput.

DR-ip TV-kkut aallakaatittagaasa saniatigut DR-ip radiokkut kanalii P1, P2, P3 aamma P4 aallakaatinneqartassapput. Danskit radioat Sky Radio aamma tusarnaarneqartalersinnaassaaq.

Nuuk TV-p pisortaa Jens Olsen oqarpoq, KNR-ip DR-imik isumaqatigiissutaanik unioqqutitsinatik, Copy Dan-imik Kodamillu isumaqatigiissuteqartoqarsimammat.

Jens Olsenip ilanngullugu oqaatigaa, DR-ip kanaliinik aallakaatitsisalernerup malitsigisaanik Nuuk TV-mi ilaasortat amerlinissaat, taamalu iluanaarutaasinnaasumik ingerlatsisoqalernissaa. Tamanna ukiup affaa qaangiuppat paasinarsiumaartoq Jens Olsen oqarpoq.