DR HDip matuneranut una nassuiaatissaavoq
Danmarkimi nunatsinnilu tv-mik isiginnaartartorpassuit X Factor USA DR HD'mi aallakaatinneqartartoq malinnaaffigaat. Tassani ilaatigut malinnaaffigeqarput popimik erinarsortartup Britney Spearsip, inuusuttuaqqanit nuannaartorisaasup Demi Lavatop, Simon Cowellip aamma LA Leidip akissarsiutiginagu erinarsortartunik nalilersuinerat.
Maannali DR HD nunatsinni Danmarkimilu isiginnaartartunut matulerpoq. DR HD'ip matuneqarnissaa DR'mi siulersuisut 2012-mi juunip qaammataani aalajangiuppaat kanaalit nutaat ammartussanngornerannik aalajangernermut atatillugu. Allannguineq atulerpat DR HD'p aamma DR Kulturip aallakaatittagaasa pitsaanersaat DR2'mi aallakaatinneqartassapput. DR nalunaarnikuugaluarpoq allannguineq januarip aallartilaarnerani pissasoq tamatumali naammassinissaa kinguaattooqqavoq.
DR HD'ip matunissaanik aalajangerneq nunatsinni TV-mik isiginnaartartut aamma malugaat, tassami Namminersorlutik Oqartussat kanaaliutaat DVB-T-kkut akeqanngitsumik takutinneqartartut DR HD ilagimmassuk.
Januarip arfineq aappaat aallarnerfigalugu nunatsinni isiginnaarneqarsinnaalersut tassaapput: KNR1, DR1, DR2, DR Ultra aamma KNR2. Ramasjang taarserlugu DR Ultra takutinneqartalerpoq taannalu meeqqanut anginernut arfineq marlunniit 12-nik ukiulinnut naleqqussagaavoq.
DVB-T-kkut kanaalini akeqanngitsuni takutinneqartalersut Naalakkersuisunit aalajangiunneqarput KNRip inassutai tunngavigalugit.
- Illoqarfinni arlalinni DR1 TV-utileqatigiit aqqutigalugit akiliilluni takuneqarsinnaavoq. DR1 maanna nuna tamakkerlugu takuneqarsinnaalerpoq taamatut periarfissaqanngitsut eqqarsaatigalugit, KNR-mi pisortaq Ivalo Egede oqarpoq.
