DR Congomi inuit ebolamik tunillatsissimasut 5000-init maanna amerlanerusut
DR Congomi inuit ebolamik tunillatsissimasutut nalunaarsukkat 5021-nngorsimapput.
Nutaarsiassaqartitsiviup Reutersip nutaarsiassiinera naapertorlugu, tamanna DR Congomi peqqinnissaqarfiup nalunaarusiaani kingullermit paasinarsivoq.
Ilisimatusarfimmit paasissutissiineq naapertorlugu inuit 2378-it virusimik tunillatsereernermi kingorna toqupput.
Nappaammik tuniluunneq DR Congop oqaluttuarisaanerani inunnit toqqutigineqarnerpaavoq.
DR Congomi ebolamik tuniluuttoqarnera inuup inuuneranik akunnerit affakkaarlugit naleqarnera FN-imit tallimanngornermi oqaatigineqarpoq.
Tuniluunneq maajip 15-ianni pisortatigoortumik nalunaarutigineqarpoq, taamanikkulli sapaatit-akunnerini arlalinni tuniluuttoqareersimanissaa ilimagineqarpoq.
Nunarsuarmi Peqqinnissakkut Suliniaqatigiiffiup (WHO) Afrikamilu peqqissutsimut oqartussaasut, Africa CDC-p, ebolamik maanna tuniluunnerup, virusimik taassuminnga toqussutaasinnaasumik siusinnerusukkut tuniluuttoqarneranit siaruaatipallannerunera juulimi mianersoqqussutigaat.
Nappaammik tuniluuttoqarnerata kingunerisaanik toqquteqartut 2018-ip 2020-llu akornanni amerlanerpaajupput, tunillanneqarsimasutut nalunaarsukkanit 3500-usuni inuit 2300-ngajaat toqummata, nutaarsiassaqartitsivik AFP allappoq.
Toqussutaasinnaasumik aanaalersitsisinnaasoq
Ebola nalinginnaasumik kissarneqarujussuartitsilersarpoq ajornerpaamillu atugaqarnermi aanaaginnalersitsisinnaavoq, tamannalu amerlanertigut toqumik kinguneqartarpoq.
DR Congomi ebolamik nunap immikkoortuini arfinilinni tuniluuttoqarnera nalunaarutigineqarpoq.
Tuniluunnerup pingaartumik nunap kangia, ukiuni qulikkuutaani akerleriinnernik nakuuserfiusunik nalaataqartoq, eqqorneqarpoq.
Peqqinnissaqarfimmi sulisut inoqarfinnut ornigunniarnerat eqqissiviilliornerit pissutigalugit ajornakusoorpoq, napparsimaviillu nappaammik tuniluuttoqarnerata nalaani saassunneqartarsimapput.
Pissutsit nappaammik Bundibugyomik taaneqartartumik, suli akiuussutissartaqanngitsumik katsorsarneqarsinnaanngitsumilluunniit, tunillatsissimasut amerliartuinnarnerat pissutigalugu ilungersunarnerulerput
WHO-lli DR Congomi ebolamik tuniluunneq qaammatit pingasut qaangiutsinnagit unitsinneqarsinnaasoraa.
Thierno Balde, WHO-mi upalungaarsimanermut pisortaq, Reutersip nutaarsiassiinera naapertorlugu marlunngornermi taama oqarpoq. Tamatumunngali pisariaqartinneqartut katersorneqarnissaat piumasaqaataavoq, Balde oqarpoq.
DR Congomi inuit 100 millioninit amerlanerupput.
RITZAU
