DR arnamik pisortaanertaassaaq
Maria Rørbye Rønn DR-imi atorfeqareerpoq, DR Jura, Politik og Strategimi pisortatut atorfeqarami.
Maria Rørbye Rønnip pisortaanertut toqqarneqarnera, Folketingimi partiit saamerliit talerperliillu tapersersorpaat:
- Pissutsinik aaqqiisinnaassuseqartumik DR-i pisortartaassaaq, DR-ip taamaalilluni ineriartornissaa siuariartornissaalu qulakkeerneqarsinnaalluni, Socialdemokratit tusagassiutinut tunngassuteqartunut oqaaseqartartuata Mogens Jensenip oqaatigaa.
Taanna Venstrep tusagassiutinut tunngassuteqartunut oqaaseqartartuanit Ellen Trane Nørbymit tapersersorneqarpoq:
- Ilisimasakka naapertorlugit pisortaaninngortussaq pikkorillunilu sullarissuuvoq, tutsuiginartuullunilu, Ellen Trane Nørby Venstremeersoq oqarpoq.
Socialdemokratit tusagassiutinut tunngassuteqartunut oqaaseqartartuata Mogens Jensenip Maria Rørbye Rønn nersualaarpaa:
- Maria Rørbye Rønn ukiorpassuarni DR-imiippoq, pissutsillu ilisimasaqarluarfigalugit, innuttaasullu sullilluarneqarnissaat Maria Rørbye Rønnip isumagiumaarpaa, Mogens Jensen oqarpoq.
DR-illu katersuuffiunissaa pingaarnertut suliassaralugu pisortaaninngortussap oqaatigaa:
- Tusagassiorfik innuttaasunik sullissisoq uannut tassaavoq imaqarluartunik suliarilluakkanillu aallakaatitassiortoq, aallakaatitassiallu assigiinngitsorpassuusinnaapput, soorlu aliikkutassiaasunik aallakaatitassiorneq, kisianni aamma tassaasinnaapput innuttaasunik katersuuffiusut, DR-imi pisortaaninngortussaq Maria Rørbye Rønn oqarpoq.
Arnani siullersaalluni DR-imi pisortaaninngussaaq, 1994-imiillu pisortaaninngortut akornanni Maria Rørbye Rønn siullersaalluni aamma DR-iminngaanneersuuvoq.
