DP sulinermi ajoqusernermut inatsimmut akerliuniarpoq
Inatsit Folketingimi Folketingip Kalaallit Nunaannut tunngassuteqartunut ataatsimiititaliaani ilaasortat novembarip ulluisa 26-anni siullermeerlugu oqallisigaat. Dansk Folkeparti akerliusoq partiit allat tamarmik inatsimmut akuersaarput.
Dansk Folkepartili isumaqarpoq, Kalaallit Nunaata Namminersulernerata kingunerisariaqaraa, soorlu sulinermi ajoqusernernut tunngasut Kalaallit Nunaata nammineq akisussaaffigisariaqarai. Isumaliutissiissummi sammisassaqartitsinermut ministerip nassiuteqqammigaani tamanna takuneqarsinnaavoq.
- Namminersorlutik Oqartussat ima tatigitigaavut, sulinermi ajoqusernermut sillimmasiisarneq Kalaallit Nunaata nammineq akisussaaffigisinnaagaa upperalutigu, Dansk Folkepartimit oqarput. Dansk Folkeparti isumaqarpoq, ineriartorneq namminersornermut inatsimmut naleqqiullugu killormut ingerlasoq, akisussaaffik aningaasartuutillu tamaasa Danmarkimut tunniunniaraanni.
Taamaammat siunnersuut partiini kisiartaalluni Dansk Folkepartip itigartinneqaqquvaa.
Sulinermi ajoqusernermut inatsisip nutaap Kalaallit Nunaat Danmarkimi inatsimmiit avissaartippaa, taamaalillutillu aamma aalisartut, piniartut savaatillillu immikkut aaqqiissuussiffigineqarput.
Lars-Emil Johansen KNR-imut ilisimatitsivoq, inatsit Folketingimi decembarip ulluisa 14-ianni pingajussaaneerneqarpat ajornartorsiutitaqanngitsumik akuerineqarnissaa naatsorsuutigigini.
