Dorthe-p uinilu Jens-Erik nunarsuaq kaajallalerpaat
Nuliaasorlu Dorthe Hegelund Kjeldsen kalaallini arnani siullersaalluni nammineerluni angallammik aqulluni sullupalukkut ingerlaarnissani qilanaareqaa.
Dorthe Hegelund Kjeldsen 64-inik ukioqarpoq uialu Jens Erik Kjeldsen 62-inik ukioqarluni. Taakku angallataat "Kigdlua" atorlugu nunarsuaq kaajallanniarpaat.
Ukiut arfineq-pingasut pilersaarusiorput
Angalanissarli piffissamik sivisuumik pilersaarusiorneqarsimavoq.
- Tassa taamani 2009-usimassooq Portugalimiilluta, oqarpunga: Når, tulliani angalassagutta sullupalukkoortariaqarpugut, tassa massakkut piviusunngulerpoq, Dorthe Hegelund Kjeldsen tulluusimaarluni oqaluttuarpoq, nangillunilu:
- Nalunngilara qimussikkut sullupalukkut angalasoqartartoq, kisianni tusarnikuunnginnakku kalaallimik arnamik nammineerluni angallammik tamaanaqquuttumik. Neriuppunga arnani siullersaallunga sullupalukkuussallunga ajornanga,
Dorthe Hegelund kjeldsen oqarpoq.
AAMMA ATUARUK Tuluit nunatsinnit qajartorlutik Skotlandiliartut
Sillimaniarnerulli tungaatigut piareersarluarsimapput; Iisartakkat, satilletikkut attaveqaatit sikusiornermullu Canadamiit sikunik nalunaarsukkanik ilisimatinneqartassallutik.
Taamaakkaluartorli Nuummiit aallalerunik qimatassaqarput, meeqqatik, ernuttatik, qatanngutitik, illortik allallu tamannali inuttaata attortissutiginngitsuunngilaa.
- Soorunami inuulluaqqunissaa pikkunassooq, kisianni nalunngilarput piffissat ilaanni tikeraarniartut. Tassa aqqutaani sumi tamaani tikeraaqallattaassuugut.
Inuulluaqqusineq
Nuliariillu Nunarput qimannginnerani nalliuttorsioqqaassapput:
- Ukioq manna ukiut 40-t qaangiupput Jensi Qullissani naapeqqaarakku, takoqqaarakku tassa paaseriaratsigu aamma Qullissani nalliuttorsiorniartut aqqusaalaarumaarpugut ullorluunniit ataaseq, Dorthe Hegelund Kjeldsen, tallimanngornermi aallartoq, KNR-mut taama oqarpoq.
Nuliariit ukiuni pingasuni angalanerminni nunat tikitaat ilaatigut ukuupput: Canada, Alaska, Hawaii, Filippinerne, Afrikap Kujataa, Madagascar, USA Nunatsinnullu uterunik Paamiunut apuuteqaassallutik.